भांगरभूंय | प्रतिनिधी
नवी दिल्ली, खबरां संस्था ः खंयच्याय देशांत रावपी गिरेस्त लोकांचो आंकडो पळयल्यार भारताचो क्रमांक चवथो आसा. २०२४ मेरेन भारतांत ८५६९८ उच्च संपत्ती व्यक्ती (एचएनआय) आसपाची अपेक्षा आसा. नायट फ्रँकच्या ‘द वेल्थ रिपोर्ट २०२५’ प्रमाण तांचो आंकडो वर्साक ६% वाडला.
हाचे आदीं २०२३ वर्सा देशांतल्या गिरेस्त लोकांचो आंकडो ८०,६८६ आशिल्लो. २०२८ मेरेन ९.४ टक्क्यांनी वाड जावन तांचो आंकडो ९३,७५३ मेरेन पावतलो अशें अहवालांत म्हणलां. सद्या संवसारांतले ३.७% गिरेस्त लोक भारतांत रावतात. संवसारांतले सगळ्यांत गिरेस्त लोक म्हळ्यार ९०५,४१३ अमेरिकेंत रावतात. हाचे उपरांत मुखेल भुंयेचेर चीनांत सगळ्यांत चड गिरेस्त लोक (४,७१,६३४) आनी जपान (१,२२,११९) आसात.
भारतांत अब्जाधीशांचो आंकडो १२% वाडलो
अहवाला प्रमाण फाटल्या वर्सांच्या तुळेंत २०२४ वर्सा भारतांत अब्जाधीशांचो आंकडो १२ टक्क्यांनी वाडलो. २०२४ वर्सा भारतांत १९१ अब्जाधीश आसतले. २०२३ वर्सा हो आंकडो १६५ आशिल्लो. भारतीय अब्जाधीशांची वट्ट संपत्ती सुमार ८२.६ लाख कोटी रुपया आसा.
संवसारांतल्या गिरेस्त लोकांचो आंकडो वाडलो
२०२४ वर्सा संवसारांतल्या गिरेस्त लोकांचो आंकडो ४.४% वाडून २,३४१,३७८ जालो. २०२३ वर्सा हो आंकडो २२,४३,३०० आशिल्लो. खंडांची विशीं पळयल्यार आशियांतल्या गिरेस्त लोकसंख्येंत ५% वाड जाल्या. हाचे उपरांत आफ्रिकेंतल्या गिरेस्त लोकांचो आंकडो वर्साक ४.७%, ऑस्ट्रेलियांत ३.९% आनी युरोपांत १.४% वाडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
