भांगरभूंय | प्रतिनिधी
उड्डाण पुलाच्या कामाचो घेतात गैरफायदो ; बेकायदो बांदकामांय चल्ल्यांत
भांगरभूंय । प्रतिनिधी
म्हापशें : गिरी वाठारांत शेतजमनी मातयेचो भराव घालून पुरोवपाचे प्रकार व्हड प्रमाणांत बिनधास्त तरेन चालूच आसात. महसूल खात्याच्या आदेशा कडेन आडनदर करून राष्ट्रीय म्हामार्ग रुंदीकरणा उपरांत आतां पर्वरी उड्डाण पुलाच्या कामाचो गैरफायदो घेवन गिरी वाठारांत चड करून मोंत गिरी आनी सुकूर गांवांतल्यो शेतजमनी बेकायदो तरेन पुरोवपाच्या कामाक ओतो आयला.
नामोशी आनी सर्वेवाडो तशेंच भोंवतणच्या वाठारा उपरांत गिरी पंचायतींतल्यो मोंत गिरींतल्यो शेत जमनी बेकायदो तरेन पुरयतात. ही जमीन सुपीक मानतात. भात पिका सयत भाजयेचे मळे ह्या जमनींचेर पिकयतात. मात कोमुनिदादचे मालकीची ही जमीन कांय शेतकारांनी पुरोवपाक सुरवात केल्या. तशेंच बेकायदो बांदकामांय उबारपाक लागल्यात.
मजगतीं, फेब्रुवारी 2023 त सरकाराच्या महसूल खात्यान आदेश जारी केल्लो. आदेशा प्रमाण गोंयांतल्या राष्ट्रीय म्हामार्ग आनी राज्य म्हामार्गाचे कुशीक बेकायदो तरेन मातयेचो भराव घालपाच्या प्रकारांचेर जमीन महसूल कायदो, कोमुनिदाद कायदो आनी गोंय जमीन वापर (बांदकाम बंदी) कायद्या प्रमाण कारवाय करपाचे निर्देश संबंदीत म्हाल उपजिल्होधिकारी, मामलेदार आनी घोळट्या पंगडांत दिल्ले.
ह्या निर्देशा प्रमाण त्या वेळार बार्देसाचे उपजिल्होधिकाऱ्यान मामलेदार आनी संबंदीत अधिकारी वर्गा वांगडा राष्ट्रीय म्हामार्ग तशेंच राज्य म्हामार्ग आनी हेर रस्त्यां कुशीच्या रस्तो रुंदीकरण वाठारांत मातयेचो भराव घातिल्ल्या सुवातांची पळोवणी केल्ली. तातूंत कोलवाळ, म्हापशें, थिवी, बस्तोडें, गिरी, सुकूर सयत हेर 36 कडेन मातयेचो भराव घालून जमीन पुरोवपा सयत ताचेर बेकायदो बांदकामां केल्ल्याचें दिसून आयिल्लें. परांत कोमुनिदाद प्रशासकांनी ह्या बांदकामांक नोटिसो जारी केल्ल्यो. मात फाटल्या दोन वर्सांत संबंदीत बांदकामांचेर कसलीच कारवाय प्रशासना कडल्यान जावंक ना. ह्या आदेशाक कोयराच्या डब्यांत उडोवन तशेंच कायदो आनी नेम खुंटयाळेक लावन तशेंच राजकारणी, पंचायत – पालिका मंडळ, प्रशासकीय अधिकाऱ्यांच्या आदारान फाटल्या दोन वर्सांत बार्देस म्हालांतल्या चड करून राष्ट्रीय म्हामार्ग आनी राज्य म्हामार्गा लागसारच्यो जमनी मातयेचो भराव घालून पुरोवपाचे प्रकार चालूच आसात.
मातयेचो भराव घालून शेतजमनी पुरोवपाच्या प्रकारांक आळाबंद घालपाचो अधिकार मामलेदार कार्यालयाक आसा. पंचायती कडेन असो अधिकार ना. मात जे सुवातेचेर बेकायदो बांदकामां उबारल्यांत, तांचेर कारवाय करपाचे नदरेन पंचायतीन नोटीस धाडून पळोवणी लेलगीत केल्या. शेतजमनी पुरोवपाक आळाबंद घालपा संबंदांत पंचायत मंडळाचे बसकेंत निर्णय घेतले.शुभम – राव देसाय, सरपंच – गिरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
