भांगरभूंय | प्रतिनिधी
म्हापशें : नामोशी गिरीच्या ग्रीनपार्क जंक्शना लागसार 1 हजार मिमी तांकीची उदकाची पायपलायन फुटली. हाका लागून हणजूणें, तशेंच कळंगूट आनी साळगांव मतदारसंघांत फाटल्या पांच दिसां सावन उदकाची समस्या निर्माण जाल्ली. हणजूणें – कायसूव गांवाक हाचो खूब मार बसलो. आयतारा फुटिल्ले उदकाचे पायपलायनीचो सोद लागतातच दुरुस्तीचें काम हातांत घेतलें.
बुधवारा 11 जूनाक हणजूणें तशेंच कळंगूट, कांदोळी आनी साळगांव पंचायत वाठारांत अचकीत उदकाचो उणाव निर्माण जालो. ताका लागून थळाव्या लोकांनी तशेंच पंचायत मंडळांनी पेयजल खात्याच्या म्हापशें विभागा कडेन संपर्क करून उदकाच्या उणावाचें कारण समजून घेवपाचो यत्न केलो. मात खंयच उदकाची पायपलायन फुटिल्ल्याचें दिसूंक नाशिल्लें. दुसऱ्या दिसा लेगीत नळाक उदक येवंक नाशिल्ल्याचें कळटाच पेयजल पुरवण खात्याच्या अधिकाऱ्यांनी उदकाचे टांकयेंत उदक कित्याक येना, हाची तपासणी केली तेन्ना मुख्य उदकाची पायपलायन फुटिल्ल्याची जाणीव अधिकाऱ्यांक जाली. शुक्रारा 13 जूनाक पेयजल पुरवण खात्याच्या कर्मचाऱ्यांनी अस्नोडें उदक शुद्धीकरण प्रकल्पा सावन मुख्य उदकाचे पायपलायनीचें तपासणी काम हातांत घेतलें. आयतारा 15 जूनाक दनपारा नामोशी गिरी ग्रीन पार्क जंक्शना लागसारच्या शेतांत 1 हजार मिमि तांकीची उदकाची पायपलायन फुटिल्ल्याचें दिसून आयलें. ही पायपलायन फुटिल्ल्यान हणजूणें तशेंच कळंगूट आनी साळगांवच्या कांय वाठारांनी उदकाची समस्या निर्माण जाल्ली. पायपलायनीचें दुरस्तीकाम झुजा पांवड्यार चालू आसा. सांजे मेरेन हें काम पुराय जावन उदक पुरवण सुरळीत जातली, अशी म्हायती पेयजल पुरवण खात्याच्या अधिकाऱ्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
