भांगरभूंय | प्रतिनिधी
म्हापशें ः गिरी राष्ट्रीय महामार्गा लागसारची मुखेल उदकाचें पायप फोडिल्ल्यान लाखांनी लिटर उदकाची नासाडी जाली. रस्त्या कुशीक उडयिल्लो कोयर नितळ करतना अनवळखी जेसीबीन हें उदकाचें पायप फोडलें. बार्देश म्हालांतले उदकाचे पुरवणेचेर परिणाम जाला.
ही घडणूक मंगळारा दनपरां सुमार १२.३० वरांचेर घडली. ग्रीन पार्क जंक्शन सावन कांय अंतराचेर सर्व्हीस रोडा वटेन कोयर उडयिल्लो. हो कोयर संबंधीतांनी जेसीबीचे मजतीन नितळ करताले. ह्या वेळार जेसीबी चालकाक कोयराच्या पोंदा उदकाचीं पायपां आशिल्ल्याचो अदमास येवंक ना आनी तें पायप फुटलें. उदकाचें पायप फुटतांच जेसीबी सयत कामगारांनी घडणुके सुवातेवेल्यान पळ काडली. हें उदकाचें पायप १००० मी.मी. तांकीचें आशिल्ल्यान, तें फुटिल्ल्यान उदकाच्या नेटाक लागून पायपांतल्यान पयस मेरेन उदक उडलें. तें उदक सर्व्हिस रोड तशें महामार्गा मेरेन पावलें. हाका लागून वाहन चालकांक त्रास सोंसचे पडले. जाल्यार कांय गाडी चालकांनी आपल्यो गाडयो ह्या उदकांत धुवन घेतल्यो.
हे विशीं म्हायती मेळटांच पेयजल पुरवण खात्याचे सहाय्यक अभियंता रोहीदास नायक आनी कनिश्ठ अभियंतो प्रज्योत नायक हांणी घडणुके सुवातेर येवन पळोवणी केली. तशेंच अस्नोडा प्रकल्पांतल्या अधिकार्यां वरवीं उदकाच्या पायपांतलें उदक बंद केलें. तशेंच ह्या उदकाच्या पायपाचें दुरूस्ती काम सांजेवेळार कंत्राटदारान हातांत घेतलें. रातच्या उसरां मेरेन हें उदकाचें पायप सारकें जावपाची शक्यता आशिल्ल्यान म्हालांत उदकाची पुरवण सुरळीत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
