भांगरभूंय | प्रतिनिधी
पणजी ः काँग्रेसींतल्यान भाजपांत आयिल्ल्या 8 आमदारांच्या अपात्र संबंदी सभापती रमेश तवडकार हांणी दिल्ल्या आदेशाक गिरीश चोडणकार हांणी उच्च न्यायालयांत आव्हान दिल्लें. मजगतीं, ह्या प्रकरणाची सुनावणी काल जाली ना, पूण आयज जाली. फाटल्या सरकाराच्या काळांत काँग्रेसींतल्यान भायर सरून भाजपांत आयिल्ल्या 10 आमदारां संबंदी दिल्लो पोरणो आदेश मान्य करून उच्च न्यायालयान 8 आमदारांच्या आड गिरीश चोडणकार हांणी दाखल केल्ली याचिका निकालात काडली.
सर्वोच्च न्यायालयाच्या सुचोवणे प्रमाण, गिरीश चोडणकार हांणी उच्च न्यायालयांत याचिका दाखल केल्ली. सर्वोच्च न्यायालयांत हे प्रकरणाचे सुनावणे वेळार सभापतींच्या आदेशा आड संविधानाच्या कलम 136 खाला याचिका दाखल केल्या. कलम 136 खाला सर्वोच्च न्यायालयाक ह्या प्रकरणाची सुनावणी करपाक मेळना अशें मुखेल न्यायाधीश संजीव खन्ना हांणी स्पश्ट केल्लें. मुखेल न्यायाधीश संजीव खन्ना हांणी चोडणकार हांकां कलम 226 खाला उच्च न्यायालयांत वचपाचे निर्देश दिले. हाचे उपरांत चोडणकार हांणी ही याचिका फाटीं घेतली.
सप्टेंबर २०२२ त काँग्रेसीचे दिगंबर कामत, आलेक्स सिक्वेरा, संकल्प आमोणकार, रुडॉल्फ फर्नांडीस, मायकल लोबो, दिलायला लोबो, केदार नायक, राजेश फळदेसाय ह्या आठ आमदारांनी एक वेगळो गट तयार करून भाजपांत प्रवेश केल्लो. गिरीश चोडणकार हांणी सभापती कडेन याचिका दाखल करून ह्या आठ आमदारांक अपात्र थारावपाची मागणी केल्ली. सभापती रमेश तवडकार हांणी तांची याचिका न्हयकारली. हाचे उपरांत चोडणकार हांणी नोव्हेंबरांत सरळ सर्वोच्च न्यायालयांत आव्हान याचिका दाखल केल्ली. निमाणी आयज सुनावणी घेवन ती याचिका निकालात काडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
