भांगरभूंय | प्रतिनिधी
आमदार अपात्रतायः आठूय फुटीर आमदारांक थाकाय
भांगरभूंय । प्रतिनिधी
पणजीः फाटले विधानसभा वेंचणुकेच्या निकाला उपरांत काँग्रेसींतल्यान फुटून भाजपांत गेल्ल्या आठ आमदारां आड काँग्रेसीचे आदले प्रदेशाध्यक्ष गिरीश चोडणकार हांणी दाखल केल्ली अपात्रताय याचिका सभापती रमेश तवडकार हांणी शुक्रारा भायर मारली. ताका लागून फुटीर आठूय आमदारांक व्हड़ थाकाय मेळ्ळ्या.
काँग्रेसीच्या आठ आमदारांनी विधीमंडळ गट भाजपांत विलीन केला. ताका लागून तांकां अपात्र थारावपाक मेळना अशें सभापती तवडकार हांणी आपल्या आदेशांतल्यान स्पश्ट केलां.
मार्च 2022 त विधानसभा वेंचणुकेचो निकाल जाहीर जाले उपरांत स म्हयन्यांनी सप्टेंबर 2022 त काँग्रेसीचे उमेदवारीचेर वेंचून आयिल्ले तेन्नाचे विरोधी पक्ष फुडारी मायकल लोबो हांचे सयत आमदार दिगंबर कामत, डिलायला लोबो, केदार नायक, रुडॉल्फ फर्नांडीस, राजेश फळदेसाय, संकल्प आमोणकार आनी आलेक्स सिक्वेरा ह्या आठ आमदारांनी भाजपांत प्रवेश केलो. काँग्रेसींत वेगळो गट स्थापन करून तांणी त्या गटाचें भाजपांत विलिनीकरण केल्लें. ते उपरांत पक्षांतरबंदी कायद्या खाला आठ आमदारांचो भाजप प्रवेश बेकायदो थारता, असो दावो करून गिरीश चोडणकार हांणी सभापती तवडकार हांचे मुखार अपात्रताय याचिका दाखल केल्ली. फाटल्या दोन वर्सां सावन हे याचिकेचेर सुनावण्यो चालू आशिल्ल्यो. अखेर फाटल्या शुक्रारा सुनावणी पुराय जावन सभापतीन अंतीं निवाडो राखून दवरिल्लो.
निवाडो अपेक्षीत आशिल्लोः चोडणकार
सभापती रमेश तवडकार हांणी दिल्लो निवाडो आपल्याक अपेक्षीत आशिल्लो. निवाडो असोच दिवपाचो आशिल्लो जाल्यार तांणी दोन वर्सां वेळ कित्याक घेतलो, हाची जाप मेळूंक ना. गोंयांत खंयच्याच राजकी पक्षाचें विलिनीकरण जावंक ना, अशें केंद्रीय वेंचणूक आयोग सांगता, मागीर काँग्रेस भाजपांत कसो कितें विलीन जालो, हाची जाप सभापतीन दिवपाची गरज आसा. आपले अपात्रताय याचिकेचेर सभापतीन जो निवाडो दिला, ताका लागून संविधानांतल्या 10 व्या परिशिश्टाचो परतून एकदां खून जाला. हे संबंदांतली आपली एक याचिका सर्वोच्च न्यायालयांत प्रलंबीत आसा. थंय सकारात्मक निकाल मेळटलो, अशी आपल्याक आस्त आसा, अशें गिरीश चोडणकार हांणी म्हणलां.
अमीत पाटकार हांचीय सभापती कडेन एक याचिका
काँग्रेस फुडारी डॉम्नीक नोरोन्हा हांणी हे संबंदांत दाखल केल्ली अपात्रताय याचिका सभापती तवडकार हांणी कांय दिसां आदीं भायर मारिल्ली. ते उपरांत चोडणकार हांचीय याचिका भायर मारल्या. आतां सध्याचे प्रदेशाध्यक्ष अमीत पाटकार हांचे हे विशींचे याचिकेचेर सभापती कसलो निर्णय घेतात, ताचेर आतां सगळ्यांचें लक्ष आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
