गिरीच्या ग्रीनपार्क जंक्शनाचेर उदकाची पायप लायन फुटुन उदकाची नासाडी
भांगरभूंय | प्रतिनिधी
म्हापशें, प्रतिनिधी ः गिरींतल्या ग्रीनपार्क जंक्शनाचेर 200 मिमी तांक आशिल्ली उदकाची पायप लायन फुटली. ताका लागून हजारांनी लिटर उदकाची नासाडी जाली. उपरांत भौशीक बांदकाम खात्याच्या उदका पुरवण खात्यान रोखडीच उदकाची पायप लायन दुरुस्त केली.
शेळ बस्तोडा आनी पालये-उसकय वाठारांक उदका पुरवण करपी ही भूंयगत उदकाची पायप लायन शुक्रारा 20 तारखेर रातची फुटली. हे विशीं शेनवारा सकाळीं साबंखाच्या उदका पुरवण खात्याक कळ्ळें. पूण तो मेरेन उदकाच्या पायप लायनीतल्यान व्हड प्रमाणांत उदकाची नासाडी जाल्ली. हें उदक जंक्शन वाठारांतल्या रस्त्या वयल्यान शेतजमनींत भरलें.
सकाळी उदका पुरवण खात्याचे अधिकाऱ्यांनी थंय पावले आनी पळोवणी केली. उदकाची लायन फुटल्या अशें कळटकच कंत्राटदाराक आपयलो. जेसीबीच्या आदारान खणून काडल्या उपरांत फुटिल्ली उदकाची पायप लायन 200 मिमीची आशिल्ल्याचे कळ्ळें. तें उपरांत दनपारां ही पायप लायन दुरुस्त केली.
गिरी फुटिल्ली उदकाची पायप लायन दुरुस्त केला. ही पायप लायन बस्तोडा आनी पालये-उसकय वाठारांक उदका पुरवण करता. आतां दुरुस्तींचे काम केल्ल्यान ह्या वाठाराक उदका पुरवण परतून सुरू जातली अशी म्हायती उदका पुरवण खात्याच्या अधिकाऱ्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
