भांगरभूंय | प्रतिनिधी
म्हापशें ः मोंते गिरी भुयारी मार्गा लागसारच्या सर्व्हिस रोडार जमनी पोंदच्यान लायटीच्यो सरयो घालपाच्या खणपाच्या कामा वेळार उदकाचें पायप फोडलें. हें ५०० एमएमचें फुटिल्लें उदकाचें पायप उदका पुरवण विभागान सारकें केलें. मात आयतारा गिरी, साळगांवां आनी सांगोल्डा गांवच्या कांय भागांतल्या लोकांचे उदकाक लागून बरेच हाल जाले.
गिरी सर्व्हिस रोडा कुशीक जमनी पोंदच्यान लायटीच्यो सरयो घालपा खातीर वीज खात्याच्या कंत्राटदारा वरवीं जमीन खणपाचें काम सुरू आसा. शेनवारा १ मार्चाक रातच्या सुमार ९ वरांचेर ह्या कामा मजगतीं मोंतेगिरी हांगचीं उदकाचीं पायपां फोडलीं. फुटिल्ल्या पायपांतल्यान व्हडा प्रमाणांत उदक व्हावून गेलें. हें उदक थंयच सांठून उरिल्ल्यान राष्ट्रीय महामार्गावेलो भुयारी मार्ग आनी आशिकुशीकच्या वाठारांत हुंवाराचें चित्र पळोवपाक मेळ्ळें. मोंतगिरी वटेन वचपी रस्तो उदकांत बुडलो. हाका लागून येरादारीक आडखळ निर्माण जाली.
हो प्रकार समजले उपरांत उदका पुरवण विभागान गिरी ते साळगांव, पर्वरी ते कळंगूटे मजगतीं वचपी उदकाच्या पायपांतलें उदक बंद केलें. आयतारा २ मार्चाक सकाळीं फुटिल्लीं पायपां ५०० एमएम तांकीचीं आशिल्ल्याचें दिसून आयलें. उपरांत रोखडींच कंत्राटदारा वरवीं उदका पुरवण विभागान दुरूस्तीचें काम हातांत घेतलें आनी दनपरां ३ वरां मेरेन हें उदकाचें पायप सारकें केलें आनी उदक सुरळीत केलें.
उदकाचें पायप फुटिल्ल्यान पुराय गिरी, तशेंच साळगांव आनी सांगोल्डा पंचायत वाठारांतल्या कांय भागांतल्या लोकांक शेनवारा रातीं तशेंच आयतारा सांजेवेळार उसरां मेरेन उदक मेळूंक ना. उदकाच्या उणावाक लागून लोकांचे हाल जाले. जाल्यार पर्वरी आनी कळंगूटे उदकाची पुरवण करपी उदकाच्या पायपांतलें बंद केल्लें उदक सोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
