भांगरभूंय | प्रतिनिधी
कोणूच तुमकां पळयनात, तरीय योग्य तेंच काम करप, खंयचेच परिस्थितींत फटींगपणा करप ना, हाकाच प्रामाणीकपण म्हणटात !! दरेकल्यान तशें वागपाचो यत्न करपाक जाय. कठीण, पूण अशक्य न्हय. प्रामाणीकपण म्हणल्यार स्वताक आनी दुसऱ्यांकूय सत्य सांगप. तशें वागप. मात, संवसारांत फटींगपणा करपाचे, दुसऱ्यांक तोपी घालपाचे, बंडलां मारपाचे प्रकार वाडल्यात. तातूंत वेपार मळाचेर गिरायकांक फटोवपाच्यो घडणुको बऱ्योच वाडल्यात. कालूच कळंगूट, बागा वाठारांत दर्जो नाशिल्ल्यो काजूबियो विकपी तीन दुकानां आड अन्न आनी वखद प्रशासनान (एफडीए) गुन्यांव दाखल केलो. म्हालूय जप्त केलो. सगलेच कडेन हें चलता. एफडीएन सेगीत खर पावलां उबारपाक जाय.
भेसळ केल्लो, दर्जो नाशिल्लो, इबाडिल्लो म्हाल विकपी कांय वेपारी सरभोंवतणी दिसतात. गोंयांतूय ते आसात. जायते फावट तांचो म्हाल जप्त जाला. दुकानां सिलूय जाल्यांत. तरीय तांकां अक्कल येवंक ना. हो म्हाल खावन गिरायकां दुयेंत पडटात, हांचेंय तांकां भान ना. फक्त आपलो गल्लो भरलो काय जालें. मनीस कश्ट करिनासतना, झटपट दुडू जोडपाक खंयच्याय थराचेर वचपाक शकता, ताचें बागांतलें काजूबियो वेपारी हें एक उदाहरण. उत्तर भारतांत दुदांत युरिया, शांपू मिस्तुराद करपाची घडणूक 20 वर्सां पयलीं राष्ट्रीय खबरां चॅनलांनी दाखयिल्ली. दोशींक धरले, ख्यास्त जाली आनी कांय तेंपान ते सुटले. मात त्या भुरग्यांक भलायकेच्यो समस्या सोंसच्यो पडल्यो. कितलो त्रास, मनस्ताप जाला आसतलो तांकां, तांच्या पालकांक? देशांतले भेसळी बाबतींतले कायदे आनीक कडक करपाची गरज आसा. निदान एक- दोगांक जल्माची अद्दल घडल्यार उरिल्ले जाग्यार येतले. भेसळ केल्ली आनी ती जिवाक घातक आशिल्ली हें सिद्ध जायत जाल्यार आमच्या देशांत कसली ख्यास्त आसा? दंड वा सादी कैद. चीनांत? जल्मठेप दितात वा सरळ गोळाक लायतात. तांणी भेसळ हो व्हडलो गुन्यांव मानला….. आनी तें योग्यूच आसा. कारण खावपाच्या जिनसांचो थेट भलायके कडेन संबंद आसता.
चवथ, नवरात्रां, दसरो, दिवाळी, नातलां, होळी, ईद, इस्टराच्या दिसांनी मिठायेंत भेसळ करपाक दरेकलो वेपारी, उत्पादक गुंग आसता. दर्जेदार म्हाल सगलेच करतात, पूण मागणी हिस्पा भायर वाडिल्ल्यान बेगोबेग पुरवण जावची म्हूण ते उण्या दर्जाचो म्हाल बाजारांत हाडटात. तातूंतलो थोडो जिवाक धोक्याचो आसता. एफडीएचे अधिकारी असल्या उत्पादकांचेर छापे मारतात. मजा म्हणल्यार दर खेपे तांकां एकलो तरी भेसळ करपी सांपडटाच. मडगांव वाठारांत पोरूं बुरश्या जाग्यार मिठाय करप्याक धरिल्लो. मुजत सोंपिल्ली, लेबल नाशिल्ली मिठाय विकपी तर कितलेशेच जाण आसात. कांय तेंप ते वेपारी ओगी रावतात आनी उपरांत ये रे म्हाज्या मागल्या….! खरें म्हणल्यार एफडीएन फक्त मिठायूच न्हय, तर धान्या पसून हाॅटेलां मेरेन, नुस्त्या बाजारांतूय तपासणी करपाक जाय. कांय खाणावळींनी तळिल्लें नुस्तें खावपाचे लायकीचें नासता. रांदपी भायले म्हणटकच गोंयचे पद्दतीन तें तळप जायना, तातूंत तें नुस्तें कालचें आसल्यार मागीर विचारूं नाकात. जीएसटी भरिनाशिल्ल्योय कितल्योशोच खाणावळी, हाॅटेलां आसात. मिठाय करपी कांय घरगुती उद्देग सरकारी परवानगे बगर चलतात, थंयचीं आयदनां, उपकरणां बुरशीं आसतात. खोया, फरसाण, तेल दर्जेदार नासता. असले गैरप्रकार करतना थोडे सांपडल्यात. अर्द कील खंवटेल्लो शेव पांच कील शेवांत मिक्स करून विकल्यार गिरायकाक दुबाव येतलोच अशें ना. पूण हें योग्य? तातूंत गोंयांत जायते कडेन भलायकेक मारक अशें जिनस सांजवेळ ते मध्यानरातीं मेरेन विकपी गाडे पळोवंक मेळटा. विशेश म्हणल्यार ते खावपाक लोक खास गाडयो करून येतात. फाटीं म्हापशें शारा भायर शोरमा खावप्यांक विखबादाय जाल्ली. कागाळ करपाक लेबलाचेर फोन नंबर दितात तो चडसो लागना. एफडीएन फक्त भेसळीचेरूच न्हय, तर हेर गजालींचेरूय बारीक लक्ष दिवंक जाय.
भेसळ केल्ले, कालचे उरिल्ले जिनस, रुच नाशिल्ले जिनस विकल्यार आमचे कडेन गिरायक येतलें? असो युक्तिवाद जायते जाण करतात. गजाल खरी, पूण उण्या जाल्ल्या गिरायकांचो जागो दुसरें गिरायक घेता, तें गेलें जाल्यार तिसरें गिरायक येता. सातत्यान दर्जो नाशिल्लो म्हाल विकल्यार मात कोणूच येनात. तें कितेंय आसलें तरी गैरप्रकार करपी वेपारी, उत्पादक पावला पावलार आसात, हें एफडीएन पुराव्यान दाखोवन दिलां. ह्या वेपाऱ्यांनी गिरायकांच्या जिवा कडेन खेळचें न्हय. गिरायक हें देवा समान, हेंय तांणी
विसरचें न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
