भांगरभूंय | प्रतिनिधी
मडगांव: रस्त्याच्या हॉटमिक्सिंगेचीं उरिल्लीं कामां हातांत घेवन पावस सुरू जावचे पयलीं पुराय करपाचें आस्वासन कुंकळ्ळीचे आमदार युरी आलेमांव हांणी काल (सोमारा) आपल्या मतदारांक दिलें.
गिरदोली पंचायत वाठारांत गिरदोली ते माकाझान, चांदोर ते कुडटरी आीन चांदोर ते रायतोडे ह्या रस्त्यांच्या हॉटमिक्सिंगेच्या कामाचो शुभारंभ केले उपरांत ते उलयताले.
विरोधी पक्ष फुडारी युरी आलेमांव हांणी म्हणलें की, थळाव्या रस्त्यांचेर हॉटमिक्सिंगेचें काम सुरू करीत जाल्यार गिरदोली आनी हेर वाठारांतल्या लोकांक थाकाय मेळटली.
मतदारांच्यो गरजो भागोवपी बऱ्यो सुविधा पुरोवपा खातीर हांव वचनबद्ध आसा. अशें केल्ल्यान विकासाक गती मेळटली आनी लांकांकूय ताचो लाव जातलो. ही मोख साध्य करपा खातीर तुमच्यो मोलादीक सुचोवण्यो म्हत्वपूर्ण आसात अशें आलेमांव हांणी म्हणलें.
सद्याचीं हॉटमिक्सिंगेचीं कामां दिल्ले मुजती भितर पुराय जातलीं अशें तांणी सांगलें. डांबरीकरणाची गरज आशिल्ल्या ह्या वाठारांतल्या चडशा भितरल्या रस्त्यांची दुरुस्ती करतले. हाका लागून थळाव्यांक येरादारी सुरळीत जावपाक मजत जातली. ज्या रस्त्यांची दुरुस्ती आनी हॉटमिक्स करपाची गरज आसा अशा रस्त्यांचेरूय आमी काम करतले अशें आलेमांव हांणी सांगलें.
ह्या वेळार कार्यवाहक सरपंच जुवांव पेशोट, पंच वांगडी मिलाग्रीन गोम्स, फ्लाविया डिकॉस्टा, बाळू निस्तानी बी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
