भांगरभूंय | प्रतिनिधी
नवी दिल्ली, खबरां संस्था ः केंद्रीय भलायकी आनी कुटुंब कल्याण मंत्रालयाच्या मतान, भारतांत 2024 वर्सा उश्माघाताक (Heatstroke) लागून 360 जाणांक मरण आयलें. त्याच वेळार हीट वॉचाच्या अहवाला प्रमाण 2024 वर्सा संवसारात उश्माघाताक लागून 40 हजारां परस चड दुयेंती मेळ्ळे आनी 733 जाणांक मरण आयलें.
भारतीय हवामान विभागान (IMD) दिल्ले म्हायती प्रमाण फुडले 10 दीस देशांत खर उश्णताय येवंक शकता. जायत्या शारांनी पयलींच तापमान 40 अंशां मेरेन पावलां. 20 परस चड शारांनी 42 अंश पार केला. देशांतल्या जायत्या वाठारांनी उश्णताय ल्हार येवपाचो अदमास उक्तायला. तापमान वाडटाना उश्माघाताचो धोको वाडटा. उश्मघात येवप ही वैजकी आणीबाणी. हाका लागून जिवाक धोको निर्माण जावंक शकता.
लक्षणां
उश्माघाता उपरांत कुड खूब गरम जाता. आंग जळटा अशें दिसता. हाचे वांगडाच मळमळ आनी उलटी जावंक शकता. घुंवळ येवप आनी अशक्तपणा इतलें खर आसूं येता की तुमकां उबे रावपाक लेगीत त्रास जावं येता. तशेंच मानसीक स्थितींत बदल जावं येता, जशें गोंदळप आनी अस्वस्थताय जाणवप. मदीं मदीं स्वास घेवपाक त्रास जाव येता.
उपचार केले ना जाल्यार…
अवयवांचे लुकसाण: उश्माघाताक लागून काळीज, मूत्रपिंड, यकृत ह्या कुडीच्या म्हत्वाच्या अवयवांचेर परिणाम जावं येता. हे अवयव सारके काम करीनात जाल्यार जिवाक धोको निर्माण जावं येता.
काळजाचो आताक: उश्णतायेचो आघात जाल्यार काळजाचो आताक वा स्ट्रोक जावंक शकता.
मेंदवाचें लुकसाण: चड काळ खर तापमानांत रावल्यार मेंदवाचें लुकसाण जावन मेंदवाक सुज येवप आनी हेर समस्या निर्माण जातात. हाका लागून स्मरणशक्त उणी जावंक शकता.
स्ट्रोकः उश्माघाताक लागून मेंदवाचेर चड ताण पडल्यारुय स्ट्रोक जावंक शकता. जाका लागून मेंदवाच्या कांय भागांक कायमचे लुकसाण जावंक शकता.
मूत्रपिंड अपेशी जावप: कुडीचें तापमान चड आसल्यार मूत्रपिंडांचेरूय परिणाम जावं येता, जाका लागून मूत्रपिंड अपेशी जावंक शकता.
यकृताचें लुकसाण: चड उश्माघाताक लागून यकृताच्या कार्याचेर परिणाम जावं येता, जाका लागून यकृत अपेशी थारूंक शकता.
स्वास घेवपाक त्रास जावप: उश्माघाताक लागून स्वास घेवपाक आनी फुफ्फुसांचेर परिणाम जावं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
