भांगरभूंय | प्रतिनिधी
मापुस्कर ब्रदर्स इन असोसिएशन फिंगर प्रिंट फिल्म, नेक्सस अलायन्स, थींक टँक आनी मॅगीज पिक्चर्स प्रस्तूत ‘एप्रिल मे 99’ हो चित्रपट येता ते गिमाचे सुटयेंत म्हणल्यार 16 मे 2025 ह्या दिसा थिएटरांनी प्रेक्षकांचे भेटीक येतलो. हालींच ह्या चित्रपटाचो पोस्टर प्रदर्शीत जाला. चित्रपटाच्या पोस्टराचें अनावरण मराठी सिनेमळा वयले ज्येश्ठ दिग्दर्शक राजदत्त हांचे हस्तुकीं जालें. ह्या वेळार निर्माते जोगेश भुटानी हांणी शाल आनी नाल्ल दिवन राजदत्त हांचो सत्कार करून आशिर्वाद घेतले.
लोकप्रीय दिग्दर्शक आनी निर्माते राजेश मापुस्कर तशेंच कास्टींगच्या मळा वयलें फामाद नांव रोहन मापुस्कर ह्या दोगांनीय एक नवो चित्रपट घेवन येता अशी घोशणा कांय दिसां आदीं केल्ली.
हालींच अनावरण केल्ल्या पोस्टरांत चार तरणाटे तांच्या सायकलीं सयत उबे आशिल्ल्याचें दिसतात. ह्या तरणाट्यांच्या माथ्यार निळें मळब आनी मुखार दर्या पळोवपाक मेळटा. पोस्टरा वयल्यान दिसता, हो चित्रपट प्रेक्षकांक इश्टागत, सपनां आनी जुवानपणाच्या भावविश्वांत घेवन वतलो. ‘एप्रिल मे 99’ अशें नांव आशिल्ल्यान हो चित्रपट गिमाचे सुटयेंत कुटुंबांतल्या ल्हान – व्हडल्यांक सगळ्यांचेच सुटयेंतल्यो यादी ताज्यो करतलो. चित्रपटांत कोण कोण कलाकार आसात हाचीं नांवां मात जाहीर करूंक नात.
निर्माते राजेश मापुस्कर म्हणटा, श्रीवर्धनांत आमचो मापुस्कर कुटुंबाचो एक सिनेमा थिएटर आशिल्लें. तें थिएटर आमकां दोगां भावां खातीर जशी एक चित्रपट शाळाच आशिल्ली. थंय राजदत्त हांचें चित्रपट आमी पळयत वाडले. इतलेंच न्हय जाल्यार आमी तांच्या दरेका चित्रपटाचो पोस्टर श्रीवर्धन आनी भोंवतणच्या गांवांत व्हरून लायताले. आयज आमी राजदत्त हांचे हस्तुकीं रोहनाच्या पयल्या चित्रपटाचो ‘एप्रिल मे 99’च्या पोस्टराचें अनावरण करतात. हाचे परस दुसरी व्हड खोस कसली आसूं येता? तांच्याच शुभेत्सांक लागून आमच्या प्रवासाक एक वेगळी शक्त मेळ्ळ्या आनी तांचे हे आशिर्वाद आमकां सेगीत प्रेरणा दीत रावतले.
लेखक, दिग्दर्शक रोहन मापुस्कर म्हणटा, आयज आपूण दिग्दर्शक म्हूण आपल्या पयल्या चित्रपटाचो पोस्टर राजदत्त हांचे हस्तुकी प्रदर्शीत करता, ही आपले खातीर अभिमानाची गजाल. प्रेक्षकांचो ह्या चित्रपटाक तेंको मेळटलो, अशी आस्त आसा. राजदत्त सरांचे आशिर्वाद आमकां फुडल्या प्रवासा खातीर उर्जा दितले हाचो आपल्याक पुराय विस्वास आसा.
‘एप्रिल मे 99’ ह्या चित्रपटाचें लेखन आनी दिग्दर्शन रोहन मापुस्कर हांणी केलां. राजेश मापुस्कर, मधुकर कोटीयन, जोगेश भुटानी, मॉरीस नून हे निर्माते आसात जाल्यार लॉरेन्स डिसोझा हे सहनिर्माते आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
