भांगरभूंय | प्रतिनिधी
देड म्हयनो सुटी म्हणल्यार भुरग्यांची सर्वांगी उदरगत जाता, हें तितलेंच खरें.
गोंयांतल्या शाळा एप्रीलांत सुरू जातल्यो हें आयकूनच भुरगीं आनी पालकांच्या पोटांत भियेवन गुळो आयला. सध्या शिगमो सुरू आसा, घुमचे कटर घुम, धोल, ताशे वाजतात आनी दुसरे कडेन शाळा एप्रीलांतूच सुरू जातल्यो ही घोशणा. देश मुक्त जायत सावन भुरगे गिमाच्या दिसांनी सुटी घेत आयल्यात. जूनांत शाळा सुरू जाताली. हो व्हडलो बदल त्रासाचो थारतलो, अशें म्हाका दिसता.
गिमाची सुटी म्हणल्यार वरदान. सकाळ सावन सांजवेळ मेरेन खेळप. मेकळे हवेत फिरप, सोयऱ्यांगेर, मामागेर वचप, इश्टां वांगडा घरा कुशीक आशिल्ल्या रानांनी वचून काण्णां, चुन्नां, जांबळां, चारां, चाफ्रां हाडून खावप, तोरां, जाम, काजू खावप. सगले सुटयेंतूच भुरगीं भोंवतालीं.
आतां एप्रीलांत शाळा सुरू म्हणटकच भुरग्यांचेर दडपण येतले. मे म्हयन्यात सुटी दितले अशें जाहीर केलां, पूण तेन्ना एप्रीला परस चड गर्मी आसता. रखरखीत वताक लागून तापमान वाडटा. घामाच्यो पावळ्यो व्हांवतात. ताळो सुकून येता. टिचर शिकयता म्हणटकच मदीं उदक पियेवपाक मेळना. अभ्यासाचेर लक्ष लागना. भुरग्यांची चिडचीड जावंक शकता. सगल्याच शाळांनी फॅन, एसी नात. वर्ग इल्लेशे, तेर्रासचे म्हणटकच गर्मी जातली. ताचे परस सुटीच बरी.
भुरग्यांची देड म्हयन्याची सुटी पालकां खातीर पसून सामकी फायद्याची. पालक आपल्या भुरग्याक गांवगिऱ्या वाठारांत आशिल्ल्या आपल्या घरा व्हरतात. थंयच्या कुळागरांत, पोरसांत, दोंगराळ वाठारांत ल्हान, सान कामां करपाक शिकयतात. काजू, सुपारी, आंब्याची लागवड कशी करची, कुयदाद कशी घेवची, हाचें शिक्षण दितात. अशें केल्ल्यान तांकां फळफळावळीचें गिन्यान मेळटा. वेव्हारीक ज्ञान, जतनाय कशी घेवप हें कळटा. पालकांचो बागायतीचो वेवसाय आसल्यार ताका भुरग्यांचीं व्हडली मजत जाता. सैमाच्या गोपांत मेळपी वखदी वनस्पत भुरग्यांक प्रत्यक्ष पळोवपाक मेळटा. देड म्हयनो सुटी म्हणल्यार भुरग्यांची सर्वांगी उदरगत जाता, हें तितलेंच खरें.
हे गिमाचे सुटयेंत भुरगीं खूब कितें शिकतात. जशें की न्हंयेंत पेंवपाक, सायकल चलोवपाक, वाद्यां वाजोवपाक. देखून तांकां ही सुटी जायच. सकाळीं उठून चलपाक वचप, सांजचें मेकळ्या मैदानाचेर वाऱ्या वांगडा खेळप. ताका लागून कूड निरोगी उरता.
मायबाप सरकारान अख्खो म्हयनो एप्रीलांत शाळा घेनासतना मदीं मदीं थोडे दीस तापमानाचो अदमास घेवन शाळकरी भुरग्यांचें हीत जपचें, ही काळाची गरज. म्हणटात, न्हय, अंत भला तो सब भला.
सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
