गिमाचीं शिबीरां

भांगरभूंय | प्रतिनिधी

शिबिराक लागून मनोरंजन जाता. वेळाचें म्हत्व कळटा. नवें शिकपाक मेळटा. इश्ट मेळटात. तेन्ना भुरग्यांनी हीं शिबिरां चुकोवचीं न्हय.

गोंयांत चडश्या शाळांतल्या भुरग्यांची परिक्षा सोंपून तांकां गिमाची सुटी लागल्या. हे सुटयेंत कितें करूं आनी कितें नाका, अशें तांकां जाल्लें आसता. थोडे मोबायल फोनाचेर पब्जी आनी हेर आक्रमक खेळ खेळपांत तल्लीन आसतात. थोडीं भुरगीं घरांत मस्ती, बोवाळ करतात. खेळत आसतात. थोडीं मामागेर वतात. थोडीं टीव्ही पळयत बसतात. भुरग्यांच्या पालकां मुखार व्हडलो प्रस्न उबो आसता. दोन म्हयने भुरग्यांची सुटी कशी वतली? सध्याचे पालक दोगूय नोकरी करपी. भुरग्यां भशेन आमकां सुटी नाशिल्ल्यान आतां आपूण कितें करचे हो प्रस्न तांकांय सतयता.
भुरग्यांच्या आवय- बापायन भिवपाची गरज ना. कारण आतां गांवांगांवांनी बायलांनी शिबिरां उक्तीं केल्यांत. ह्या गिमाच्या शिबिरांत खेळ, संगीत, कला, हस्तकला, गीतगायन, नाटकुलीं, चित्रकला, पेंटिंग, वादन सगलें शिकयतात. टाकावू पसून टिकावू वस्तू करप, त्या वस्तूंचें प्रदर्शन आयोजीत करप, सर्त दवरप हेंय चलता. ह्या शिबिरांक फी आसता. ती भरून भुरगीं तातूंत वांटेकार जावंक शकतात. प्रदर्शना वेळार वस्तूंची विक्री जाता. चार पयशेय मेळटात. भुरग्यांक पयशांचो वेव्हार कळटा.
भायर मेकळे हवेंत झाडाचे सावळेंत तरेकवार मैदानी खेळ, फुटबाॅल, क्रिकेट, खोखो, लंगडी, लगोरी, धांवचेल्यानी… आपणाक आवडटात ते खेळ भुरगीं खेळटात. तांची एकमेकां कडेन वळख जाता. विचारांचें दिवप- घेवप जाता. तांचे भितरल्या गुणांक वाव मेळटा. गिन्यान वाडटा.
आयच्या काळांत गिमाचीं शिबीरां गरजेचीं जाल्यांत. कारण शाळेच्या व्यस्त जिवितांत भुरग्याक आपल्या आवडीचे छंद पुराय करपाक कसोच वेळ मेळना. सकाळीं शाळा, दनपरां ट्यूशन, सांजचो अभ्यास, रातची दुसरे दिसाची उजळणी, होमवर्क. भुरगो हातूंतच घुस्पता. मात शिबिरांनी विंगड गजाली भुरग्यांक शिकपाक मेळटा. आवडीचे छंद, पेंवप, सायकल चलोवप शिकपाक मेळटा. तांचें व्यक्तीमत्व सुदारता. आत्मविस्वास वाडटा. फुडाराक तांकां ताचो फायदो जावं येता.
शिबिरांक लागून भुरग्यांची स्मरणशक्त वाडटा. छंद पदरांत घेतिल्ल्यान तीं सक्षम जातात. आत्मनिर्भर जातात. नोकरी करपी पालकांक असलीं शिबिरां आसप म्हणल्यार व्हडली थाकाय. कारण भुरग्यांक थंय घालपाक मेळटा. तांकां भुरग्यांचो हुस्को करचो पडना. मोबायलाचेर गेमी खेळप भलायकेक घातक. ताचे परस तांणी गुगलाचेर वचून ज्ञान वाडोवपाक जाय. शिबिरांची फी कांय वेळार चड आसता, पूण पयशे फारीक जातात.
शिबिराक लागून मनोरंजन जाता. वेळाचें म्हत्व कळटा. नवें शिकपाक मेळटा. इश्ट मेळटात. तेन्ना भुरग्यांनी हीं शिबिरां चुकोवचीं न्हय.

सिद्धी तिळवे
9158200956