भांगरभूंय | प्रतिनिधी
कुडींत दुखप, रोगप्रतिकार शक्त उणी जावप, थंडी आनी खोंकली अशो जायत्यो समस्या गिमाच्या दिसांनी चड जातात. अशे स्थितींत रोगप्रतिकार शक्त घट, बळिश्ट करप गरजेचें आसता. बरी रोगप्रतिकार शक्त कुडीक वेगवेगळ्या संसर्ग आनी दुयेंसां पसून राखण दिवंक शकता. खास करून जोराच्या दिसांनी तुमची रोगप्रतिकार शक्त बळिश्ट करप म्हत्वाचें. भारतांत एच 3 एन 2 व्हायरसाचो वाडत वचपी संसर्ग पळोवन रोगप्रतिकार शक्त घटमूट दवरपाची वेळ आयला. नेमान व्यायाम करप, फावो ती न्हीद घेवप, धूम्रपान सोडप, निरोगी कुड सांबाळप आनी सोरो पिवप टाळप हे रोगप्रतिकार शक्त वाडोवपाचे मुखेल मार्ग. अंदूं गर्मी चडूच वाडल्या. योग्य आहारा सयत कांय खाणांय रोगप्रतिकार शक्त वाडोवपाक मजत करतात. देखीक….
1) आंबट फळां
लिंबू, संत्रां, द्राक्षां सारकिल्लीं आंबट फळां आहारांत आस्पावचीं. तातूंत अँटिऑक्सिडंट्स आनी जीवनसत्व सी भरपूर प्रमाणांत आसता. जे रोगप्रतिकार शक्त वाडोवपाक मजत करता.
2) बदाम
बदाम खाल्यार रोगप्रतिकार शक्त वाडटा, कारण तातूंत पोशक तत्वां भरपूर आसतात. हाचे भायर बदाम काळजाची भलायकी सुदारपाक मजत करता. बदाम हो जीवनसत्व ई, जस्त, मॅग्नेशियम आनी प्रथिन सारकिल्या गरजेच्या पोशक तत्वांचो व्हड स्रोत आसून ताका लागून रोगप्रतिकार शक्त वाडटा.
3) हळद
हळद हो एक उपेगी मसालो, जाचो आमच्या आहारांत जायत्या तरांनी वापर करुं येता. हळदीत कर्क्युमिन गुणधर्म आसता जें रोगप्रतिकार शक्त वाडयता. तुमी दर दिसा हळद घालून दूद पियेवंक शकतात वा दिसपट्ट्या जेवणांत मसाल्यांत हळद वापरूं येता.
4) पाचवी च्या (ग्रीन टी)
पाचवी च्या फकत वजन उणें करपाक न्हय तर रोगप्रतिकार शक्त वाडोवपा खातीरय वापरतात. पाचवे च्याचे हेर जायते फायदे आसात. पाचव्या च्यांत एपिगॅलोकाटेचिन गॅलेट आसता, जें दुयेंसा आड झुजपी अँटीऑक्सिडेंट तयार करता. हाका लागून आमची रोगप्रतिकार शक्त घट जाता. ही च्या बाजारांत मेळटा. घरचे घराय करपाक मेळटा.
5) ताक
ताक हें कॅल्शियम भरपूर आशिल्लें देशी पेय. कुडीक ताजेपण दिवपी हें पेय गिमाच्या दिसांनी खूब फायदेशीर मानतात. ताकांत आशिल्लें लैक्टिक ऍसिड रोगप्रतिकार शक्त सुरळीतपणान काम करपाक मजत करता. ताक वा छासात सेंधव मीठ, मिरपूड, पुदीना पानां आनी हेर मसालो घालून गिमांच्या दिसांनी पियेवंक शकता. तातूंतल्यान तुमकां रुचीक भारतीय पेय पियेवपाचो आनंद मेळटलो. आतां ताक बाजारांत विकत मेळटा. वेगवेगळे तरेचीं ताकां व्हडल्या कंपनींनी बाजारांत हाडल्यात. पूण घरगुती ताक हेरां परस बरें.
लसूण, आलें, किवी, पोपाय, ब्रोकोली, पालक, धंय, भोपळी (सीमला, ढब्बू) मिरसांग, बियो आनी काजू अशे हेर जायती खाणां रोगप्रतिकार शक्त वाडोवपाक मजत करता. पिरायेची चाळीशी हुपली काय मात आपले कुडीची जतनाय घेवपाक जाय. शुद्ध तापयिल्लें, थंड केल्लें उदक पियेवप सदांच बरें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
