भांगरभूंय | प्रतिनिधी
तें पा प्रमाण कुरपणे घालत शेंकड्यांनी वर्सां पयलींच्या कायद्यांत गोंय सरकार बदल करता. गिन्यान दिवपी, वाडोवपी, नवनिर्मणेक उर्बा दिवपी विद्यापिठां हाडपाक सोदता. जावपी बदलांची म्हायती दिवपी माची सरकारान पयलीं तयार केल्यार विरोध कोण करतलो? ते माचये वेल्यान म्हायती लोकां मेरेन पावोवपाचो वावर करपी उंचेले शिक्षण घेतिल्ले, गिन्यांनी, अणभवी आसप म्हत्वाचें. म्हायती वेळार लोकांक दिवपय गरजेचें. वेळारच म्हायतीचें पेटूल लोकां खातीर उक्तें केल्यार आंदोलनां, हुंवारांतल्यान जावपी लुकसाण जावचें ना हाची जतनाय सरकारान घेवची. म्हायतीच्या जाळांत घुस्पतना अचूक म्हायती घेवपी, दिवपी बदलांक येवकार दिवपाचो संकल्प अंदू दसऱ्या दिसा सरकारान करचो.
नवरात्रांच्या दिसांनी पर्यटकांची खातड गोंयांत जातली. पर्यटकांचे गर्देंत गोंय चिड्डूचें ना हाची जतनाय घेवपाची शिटकावणी पयलींचे केंद्रीय मंत्री सुरेश प्रभु हांणी हालींच दिली. ते गोंयचे जांवय. गोंयांत उद्देग, वेवसाय, राजकारणांत, शेतां भाटांनी घुस्पून रावपाकa सुवात सोदतना तांकां भुतांचें बंगले, घरां दिसल्यांत व्हय?
हालींच मडगांव मेरेनच्या येरादारींत वेर्णा पठारा वयले सुवातींत व्हडल्या कंपनींच्या जायरातींची होर्डिंग्ज दिसलीं. येरादारीच्या जंक्शना वयल्या ह्या होर्डिंग्जांनी भुतां (नी) लिपचोरयां कित्याक येवचें ना? सरकार सादूर आसल्यार लिपिल्ल्या भुतां (नी) कय धांवडावपाक वगत लागचो ना.
पयलींच्या केंद्रीय मंत्र्यांनी दिल्ले शिटकावणेन सरकार जागें जालां. कोमुनिदादींच्या सुवातींतलीं कावलाची गर्दी कायद्यांच्या चपक्यांत हाडपाची तजवीक करतना हजारांनी खोंपींचे सुवातेर काँक्रिटाचीं रानां नाकात. काँक्रीट गांवां मेरेन व्हरतना येवपी आॅनलायन विद्यापिठां संवसारांत कुशळटायेच्या गिन्यानाचे दिवलेंतल्यान उजवाड दितलीं. सरकारा बराबरीन तुमचो आमचो संकल्प उजवाडा कडेन वचपाचो आसचो.
देशा बराबरीन गोंयांतय उदरगत जाता, उदरगतीच्या मळार गोंय काल फाटीं पडलें, आयजय मात्शें फाटींच आसा आतां धांवचें पडटलें. धांवतनाय फाटल्यान फुडल्यान नाचपी भुतांय शिक्षण, अणभवान गिन्यान मेळना जाल्यार प्रशिक्षणाची वाट आसा. ते वाटेरय फातर, कंवच्यो, कांट्यांचो विरोधाक विरोध करतल्यांचो पावस पडटलो तेन्ना तांकां अळंग कुशीक काडपाक कळाव कित्याक?
मुख्यमंत्री डाॅ. प्रमोद सावंत राष्ट्रपिता महात्मा गांधी जयंती दिसा गोंयांतली शांतिकायेची दिवली पेटत दवरपाचो उलो मारला. त्याच मार्गान गोंयकारांक वच्चें पडटलें, गांधी महात्म्यांचीं चिंतनाय गोंयचे राजभाशेंतल्यान सांगचीं पडटलीं. तोच संकल्प दसऱ्या दिसा करुया, गोंयकारांनो एकठांय रावया. संवसारांतल्या गिन्यांनी, कुशळ गोंयकारांक लागीं हाडून म्हान जावया. चलपा, भोंवपाची वाट आडावप कित्याक? दर्यादेगांनी भोंवतना कोयराच्यो राशी जावच्यो नात, भोंवडेकारांक लुटचे नात हे सांगपी सानुले तक्टे लावपाची जापसालकी हाॅटेलवाल्यांनी घेवची. सनबर्नाचें भूत दर्यावेळो अशीर जातना एक वर्स आडावन दवरुया. दिवाळेक नरकासूर वाड्यार एकूच आसचो, राजकारण्यांनी ताका तेंको दिवचो न्हय हो रकाद मुख्यमंत्री पावयतले अशी आस्त बाळगुया.
सनबर्नांत लेंसंगीत परब्रम्हा कडेन व्हरपी, घुवंळे वखदांच्या हुंवारांत गोंय बुडोवपी आसल्यार सनबर्नाक बदलाची वाट सरकारान कित्याक दाखोवची न्हय? दिवाळेचे फांतोडेर गोंय कला अकादमीत कला शिक्षणाच्या उजवाडाची पण्टी पेटोवची पडटली. कला, खेळाचीं आॅनलायन विद्यापिठां आमच्या देशांत आसात, गोंयान तांकां जोडून घेतल्यार?
आंगांत कुशळटाय जल्मा सावन आसची पडटा, मुळाव्या शिक्षणांतल्यान तिका जोड मेळटा. मुळावें शिक्षण मायभास, राजभाशेंतल्यानच जावचें हो संकल्प दसऱ्या दिसा करुया. भारतांतच कित्याक विदेशांतय प्रदेश, राज्यांचे म्हत्व वाडटा हें भुरग्यांकय कळपाक लागलां. राष्ट्रप्रेमी भुरगींय राज्य, देशा भायर शिकपाक वतात, थंयच रावतात, थंयचींच जातात, परतय येतात राष्ट्राच्या मोगांतल्यान.
गोंयची सवस्तकाय इबाड नाकात, शिकात, शिकयात हो उलो जंय वतां थंय मारपाची गरज आसा. उंचेल्या शिक्षणांत, नोकरेंत, राजकारणांत मेंदवाचेर पडपी चेपण उणे जावपाक संगीत उपेगी हें सांगपाक जाय.
चवथीक मोरया जालो ना म्हणून भिवपाची गरज ना. मंत्री लोकांक तोंड दाखोवपाक गांवांगांवांनी भोंवपाक लागल्यात. नितळसाणीचो रकाद घरा घरांनी पावयतना राजकारण नितळ, निर्मळ जातलें, आमी नितळ रावतलें, शिताचो एक कणय भायर उडोवचे नात असो सोपूत घेवचो, दिवचो, संकल्प करचो पडटलो.
बदलाचें वारें येवपाक लागलां. 2027 त 27 खातीर 2024 अखेर, 2025 च्या उदेंतेच्या सुर्याची वाट कित्याक पळोवप? ताचे आदीं मंत्रीमंडळांत खातें बदल कित्याक करचे न्ही? दसरो, दिवाळी, व्हडले दिवाळेचे म्हूर्त लागीं आसात. मंत्र्यांच्या खात्यांनी बदल जातले हें गोंयचें राजकारण अस्ताव्यस्त जावचे पयलीं दिल्ले शिटकावणेंतल्यान कळ्ळां.
राजकारण विखुरता तेन्ना राज्य, राष्ट्राक लुकसाणाचे हुंवारय सोंसचे पडटात. शेंकड्यांनी लोकांक ह्या संवसाराचो निरोपय घेवचो पडटा तेन्ना मनीसपण शेणूंक दिवंक जायना. मनीसपणाच्या तत्वांचे कसवटेचेर फुडें वतना सुडाचें राजकारण कित्याक खेळप?
आतां चूडय नाका, सूडय नाका फुलांच्या पाकळ्यांचो शिंवर करून अहिंसेच्या मार्गान वचपाक गोंयाक फुडें सरचें पडटलें. हो अंहिसेचो मार्ग एकल्याचो न्हय तो राष्ट्रपित्याचो (राष्ट्राच्या वडिलांचो).
आवय बापूय नाशिल्ल्यांकय अनाथाश्रम आसतात. ते सांबाळपाची जबाबदारी घेवपी राजकारण करूंक लागल्यार बडी मारपाक काल,आयज गोंय एक पावल फुडेंच आसा. फाल्यां कितें जातलें तें चिंतप ना, सगलें आयजच सोंपोवया, आमीय वांटेकार जावया अशें म्हणपी सरकारी जांवय आसात? त्या जांवयांक वडीर काडपाचो वावरय सुरु जाला. त्या वावराक नेट दिवचो.
मंत्री नेटान भोंवपाक लागल्यात पूण ते समेस्तां मेरेन पावतात की समेस्तांतली गिरेस्तकाय सोदतात? मुख्यमंत्र्यांनी दीसभर मंत्र्यांची हजेरी पक्षाचे कचेरेंत लावंक लायल्या. कोण येतात, कोण वतात हाची वळेरी दवरपाच्या वावरांत घुस्पल्ले कालचेच? प्रशिक्षण घेवन भरती करतना फाटल्या दारांतल्यान अणभव नाशिल्ले येतात? कालच्यांनी नव्यांक शिकयतना नवे सुदारपाच्या मार्गाक लागल्यार, उंचायेर गेल्यार तांकां उमेद दिवपाचें कालचें धोरण. आयजय त्या तत्वांक दसून रावपी आसतले. दुसऱ्यांक शाबासकी दितना कालचेय व्हड जातले. बदल्यो, प्रमोशनां करतनां एखादऱ्याक फाटल्यान दवरपाचें राजकारण जावचें ना हो सरकाराचो संकल्प आसचो.
कितल्याशाच खात्यांचें वजें माथ्यार घेवन मुख्यमंत्री राविल्ल्यान तांचे लागीं आशिल्लीं मूळ खातीं विखुरल्यांत? तांकांय खबर नासतना. मुळाव्या भाजपा प्रतिनिधींक लागीं हाडटना, वांगड्यांचे वळेरे कडेन पळयतना अस्तुरी व्हड प्रमाणांत दिसतली. ते वळेरेंत भांगर, रुपें जोडिल्ल्यांक सांबाळून घेवपाचो संकल्प सरकारान करचो. तोय वावर जाता मात्सो सवकासायेन पूण नितळ करपाच्या निश्चेवान.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
