भांगरभूंय | प्रतिनिधी
जिणेंत उमळशीक तिगोवन दवरल्यार जिवीत चड सोबीत, गिरेस्त आनी समाधानकारक जातलें.
जिणेंतली उमळशीक हो मनशाच्या जिविताचो एक गरजेचो भाग. उमळशीक वा उत्सुकताय आमकां नवी गजाल शिकपाक, नव्या गजालींचो अणभव घेवपाक आनी स्वता विशीं चड जाणून घेवपाक प्रेरीत करता. जिवितांत उमळशीक आसता तेन्नाच आमचें मन सदांच जागृत उरूंक शकता, सोदपाची इत्सा जागृत जाता आनी नव्या क्षितीजांचो सोद घेवपाची प्रेरणा मेळटा.
जिणेंतली उमळशीक हें मनशाच्या सभावाचें व्हडलें खाशेलपण. आमची उमळशीक आमच्या जल्माच्या खिणा सावन सुरू जाता. देखीक ल्हान भुरग्यांक पळयात नवे वस्तू, आवाज, रंग पळोवन तांकां उमेद जाता. अज्ञाताक केन्नाच भियेनात, कारण तांची उमळशीक तांकां नवी गजाली शिकपाची प्रेरणा दिता. पिराय वाडत वचत ही उमळशीक उणी जावंक शकता, पूण ती केन्नाच सोंपना.
हीच उमळशीक आमकां शिकपाची, सोदपाची आनी सुदारपाची प्रेरणा दिता. जिणेंत उमळशीकेची भुमिका जायत्या वाठरांत दिसता. शिक्षणीक मळार विद्यार्थी उमळशीक दाखयतात, जाका लागून तांचें गिन्यान वाडटा. संशोधक नवे सोद घेतात, शास्त्रज्ञ नवे प्रयोग करतात, कलाकार नव्या कला प्रकारांचो सोद घेतात. फकत उमळशीकेक लागून ह्यो सगल्यो गजाली शक्य जातात. देखूनच “उमळशीक ही गिन्यानाची आवय” अशें म्हण्टात. उमळशीक आमकां आमच्या सपनांक पाळो दिवपाक प्रेरणा दिता, आमचीं तांक उक्तीं करुंन जिणेंत नवी शक्यताय उक्ती करता. पूण जिणेंतले उमळशीके फाटली भावना चडशी सकारात्मक आसली तरी तातूंत कांय उणेपणूय आसूं येतात.
चड उमळशीक आनी अनपेक्षीत सोद तुमचो वेळ आनी उर्जा वाया घालूंक शकता. केन्ना केन्नाय हे उमळशीकेक लागून गरजे भायर जोखीम घेवप, धोक्याचे अणभव घेवप वा चुकीच्या मार्गान व्हरपाक शकतात. देखून उमळशीकेचो योग्य रितीन उपेग करप गरजेचें आसता, जाका लागून तातूंतल्यान सकारात्मक परिणाम मेळूं येतात. जिणेंत उत्सूकत रावपाचे जायते मार्ग आसात. नवी गजाल शिकपाची इत्सा, वेगवेगळे अणभव घेवप, संशोधन करप, वाचप आनी संवाद सादप हांकां लागून ही उमळशीक तिगून उरता.सोशल मिडियाचेर लेख, व्हिडियो, वेबिनार, आनी वेगवेगळ्या विशयांचेर कार्यशाळा आमची उमळशीक जिवी दवरपाक मजत करतात. नवी कुशळटाय शिकप, भोंवप, वेगवेगळ्या संस्कृतायांचो अणभव घेवप हीं सगलीं आमच्या उमळशीकेक इंधनाची पुरवण करतात.
जिणेंत उमळशीकेचे म्हत्व फकत वैयक्तीक उदरगती खातीर न्हय, तर समाजीक उदरगती खातीरुय गरजेचें आसता. उत्सूकत लोक नवे विचार, नवकल्पना, संकल्पना मुखार हाडटात. समाजांत प्रगती करपाक ते योगदान दितात, नवे उद्देग, संशोधन आनी नवनिर्माण तयार करपाक मदत करतात.देखून दरेकल्यान आपली
उमळशीक तिगोवन दवरपाची गरज आसा, कारण तांकां नवी दिका दाखोवपी तेंच फुडले पिळगेक मार्गदर्शन करतात. ते भायर उत्सूकता मनशाक जिणेंत उमेद आनी खोशी दवरता. जेन्ना आमी कितेंय नवें शिकतात, नवो अणभव घेतात वा खाशेले सुवातेर वतात तेन्ना आमची वृत्ती सकारात्मक जाता. जिणेंतलीं ल्हान ल्हान गजाली लेगीत आमी व्हड खोशेन स्वीकारतात. हीच उमळशीक आमकां सतत प्रगती करपाक प्रेरीत करता आनी आमचें जिवीत चड अर्थपूर्ण करता. अर्थांत जिणेंतली जिज्ञासा फकत भायल्या गजालींचेर आदारिल्ली न्हय, ती भितरल्यानय येता. आमचीं सपनां, आकांक्षा आनी ध्येयां हांकां लागूनय उमळशीक निर्माण जाता. ताका जाय पडटा, तुमच्या भंयाचेर मात करप, धैर्य, धाडस तयार करप आनी सतत नव्या गजालींचो सोद घेवपाक तयार रावप. स्वताचेर विस्वास दवरप, सकारात्मक विचार करप आनी स्वताक आव्हान दिवप हींय एक उत्सुकताय तिगोवन दवरपाचीं कळाशी.
जिणेंत उमळशीक तिगोवन दवरपा खातीर कांय मुळाव्या गजालींची जतनाय घेवची पडटा. लक्ष केंद्रीत दवरप, तुमकां आवडटा तें करप आनी नकारात्मक विचारां पासून पयस रावप म्हत्वाचें. जिणेंतलो दरेक अणभव हो शिकपाचो अणभव, आनी दरेक चूक आमकां कितें तरी नवें शिकयता हें समजून घेवप, उत्सुकताय तिगोवन दवरपाक आदार करता. जिणेंतली उमळशीक ही मनशाच्या जिणें खातीर मोलादीक. तातूंतल्यान आमकां नवी गजाली शिकपाची, अणभव मेळोवपाची आनी स्वताची चड वळख वाडोवची संद मेळटा. ही उमळशीक आमचें जिवीत चड रंगीत, अर्थपूर्ण आनी प्रेरणादायक करता. देखून दरेकल्यान मनांत ही उत्सुकताय जागृत करची, कारण तीच आमकां मुखार वचपाक प्रेरीत करता. म्हाका दिसता जिणेंत उमळशीक तिगोवन दवरल्यार जिवीत चड सोबीत, गिरेस्त आनी समाधानकारक जातलें.
——————————–
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
