भांगरभूंय | प्रतिनिधी
पणजी ः गोंयांत ‘गावडे’ हे आंडनांव आशिल्ल्यान ते राज्यांत चड प्रमाणांत वापरतात. ताका लागून कोणाकूय ‘गावडे’ म्हणप हो जातीवाचक शब्द न्हय अशें निरीक्षण नोंद करुन उत्तर गोंय जिल्लो आनी सत्र न्यायालयान दोगांय दुबावितांक आरोपमुक्त थारायल्ले. गोंयच्या मुंबय उच्च न्यायालयान वयल्या निर्णयाक मान्यताय दिवन हे संबंदी दाखल केल्ल्या पुनर्विलोकन याचिकेंत कसलीच योग्यताय नाशिल्ल्यान ही याचिका न्हयकारली. हे संबंदीचो आदेश न्यायमूर्ती वाल्मीकी मिनेझीस हांणी दिलो.
ह्या प्रकरणांत कागाळदार बायलेन 4 मे 2020 दिसा फोंडें पुलीस स्टेशनांत कागाळ दाखल केल्ली. तातूंत कागाळदार बायलेन मंजिरी धारगळकार आनी पुलीस निरिक्षक देवयानी नायक हांणी तिका ‘गावडे’ अशें म्हणत वेगवेगळ्या दिसांनी तिचे आड जातीवाचक टिप्पणी केल्ल्याचो दावो केल्लो. हे कागाळीचेर आदारुन फोंडें पुलिसांनी अनुसुचीत जाती आनी अनुसुचीत जमाती अत्याचार प्रतिबंधक कायदो, 1989 च्या कलम 3 (1) (आर) (एस) खाला दुबावितां आड गुन्यांव नोंद केल्लो. पुलीसांनी 17 ऑक्टोबर 2020 दिसा प्राथमीक चवकशी करून उत्तर गोंय जिल्लो आनी सत्र न्यायालयांत आरोपपत्र दाखल केल्लें.
ह्या प्रकरणांत उत्तर गोंय जिल्हो आनी सत्र न्यायालयांत खटलो सुरू जाल्लो. कागाळदार बायलेन दोनूय दुबावितां कडेन वेगवेगळ्या दिसां संवाद सादलो. दुबावीत देवयानी नायकान ज्या दिसा तिका ‘गावडे’ अशें म्हणलें असो कागाळदारन आरोप केल्लो त्या दिसा देवयानी नायक पुलीस स्टेशनांत आशिल्ली. हे संबंदी तिणें न्यायालयांत पुरावे सादर केल्यात. देखून कागाळींत सत्य ना हें स्पश्ट जाता. तशेंच गरजेचे पुरावे मेळूंक नाशिल्ल्यान न्यायालयान दोगांय दुबावितांक आरोपमुक्त थारायले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
