भांगरभूंय | प्रतिनिधी
कुडचडेंच्या गार्डीयन अॅंजेल स्पोर्ट्स क्लबान लोटली पंचायत करंड आंतरगांव फुटबॉल सर्तीचें वस्तादपण जोडलें. लोटलीच्या मोंतेर मैदानाचेर जाल्ले फायनलींत गार्डीयन अॅंजेल स्पोर्ट्स क्लबान युनायटेड क्लब ऑफ वेर्णाक 2-1 अशा गोल फरकांनी हारोवन किताब जिखलो.
गार्डीयन अॅंजेल स्पोर्ट्स क्लबा वतीन दोनूय गोल रायन मिनेझिसान केले, जाल्यार युनायटेड क्लब ऑफ वेर्णा वतीन एक गोल डॅसमण्ड परेरान केलो. युनायटेड क्लब ऑफ वेर्णान बरोबरी करपाचो खूब यत्न केलो. पूण, ताका अखेर मेरेन येस मेळूंक ना.
वेर्णाच्या फॉरवर्ड खेळगड्यांनी गोल करपाचे साबार यत्न केलो. पूण, गार्डीयन अॅंजेल स्पोर्ट्स क्लबाच्या डिफॅण्डरांनी तांचे हल्ले परतावन लायले.
इनामां भेटवण सुवाळ्याक मुखेल सोयरो म्हणून आदलो आंतरराष्ट्रीय फुटबॉलर अॅलव्हितो डीकुन्हा उपस्थीत आशिल्लो.
हेर वैयक्तीक इनामांः रॉयल मोनिझ (उत्कृश्ट गोलकीपर, युनायटेड क्लब ऑफ वेर्णा), रायन मिनेझीस (उत्कृश्ट स्ट्रायकर आनी मॅन ऑफ द मॅच, गार्डीयन अॅंजेल स्पोर्ट्स क्लब), पेले कोस्ता (उत्कृश्ट डिफॅण्डर, गार्डीयन अॅंजेल स्पोर्ट्स क्लब), हिल्टन फर्नांडीस (उत्कृश्ट मिडफिल्डर, युनायटेड क्लब ऑफ वेर्णा).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
