भांगरभूंय | प्रतिनिधी
गाय, बैल, माजर, कुत्रे आनी हेर प्राणी उपेगी ह्या खातीर मनशान पोसल्यात. श्रीकृष्णान गायचो उपेग सामको बरो वळखलो. गोकूळांत ल्हानाचो व्हड जाल्ल्या ह्या कृष्णाक गायचें व्हडपण कळ्ळें. व्हड जाल्या उपरांत सगळ्याक गायचें व्हडपण तो सांगपाक लागलो. ‘गवळी कृष्ण’ अशीं ताचीं फकांडांय जावपाक लागलीं. कृष्णय मोटेपणान सांगपाक लागलो, “हय, हांव फकत कृष्ण न्ही तर हांव गोपाळकृष्ण. गोपाळ हें म्हजें उणाकपण न्ही तर तें व्हडपण आसा. चक्रवर्ती श्रीकृष्ण म्हणून म्हाका मिरोवपाक नाका, गोपाळकृष्ण ह्याच नांवान म्हजी वळख सगळ्या संवसाराक जावची अशी म्हजी इत्सा.”
गाय म्हणल्यार देव मानपाक लागले. तिचें रक्षण करपाक राजा आपले प्राण दिवपाक लागले. दिलीपराजान गायक वाचोवपाक आपलो देह शिंवा मुखार व्हेलो. ज्या वेळार राष्ट्राक नवें ध्येय दिवपाचें आसता त्या वेळार त्या ध्येया खातीर आपलें बलिदान करचें पडटा. तें ध्येय म्हणल्यारच देव, तें ध्येय म्हणल्यारच ईश्वर. आयज खादी, चरखो ह्या गजालीं खातीर बंदखणींत मरसर उपास करपी सत्याग्रही तयार जाल्यात. त्या त्या नवीन ध्येया खातीर तें ध्येय मेळोवन दिवपी कितले कश्ट करपाक तयार आसा हें लोक पळयतात. दर एका ध्येयार्थीक मरणाची परिक्षा दिवची पडटा. गायचें ध्येय दिवप्यांनी हेंच केलें. समाजाक गोसेवेचें म्हत्व पटोवन दिवपा खातीर प्राण दिवपी तयार जाले. आयज भारतांतल्या लोकांक गायचें व्हडपण आसा तें अशें सहज येवंक ना. पूण गायचें दूद पिवप ना, तिका पळोवप ना पूण तिची शेंपडी मात आपल्या तोंडा वयल्यान भोंवडावप, तिका रस्त्यार नमस्कार करप म्हणल्यार दांभीकपणा आसा आनी असल्या यांत्रीक धर्माचो तिरस्कार करपाक जाय.
गायचें मांस खावपाचें सोंपेपणान बंद जालें ना. भवभूती नांवाचो एक व्हडलो महाराष्ट्रांतलो नाटककार सव्या सातव्या शेंकड्यांत जालो आसतलो. ताच्या उत्तररामचरित ह्या उत्कृश्ट नाटकांत वाल्मिकीच्या आश्रमांत वसिष्ठ-जनक आनी हेर आयले. त्या वेळार सोयर्यांच्या सत्कारा खातीर दिल्ल्या जेवणा खातीर एक पाडी मारिल्ली असो उल्लेख आसा. त्या दाढीवाल्या रुशीन आपली एक पाडी रुचीन खाली अशें आश्रमांतले भुरगे म्हणटात असो उल्लेख आसा. हाचो अर्थ असो म्हणल्यार भवभूती आपल्या नाटकांत असो उल्लेख करपाक अनमनलो ना. घडये पयलींच्या काळांतली पद्दत ह्या खातीर नाटककारान तशें बरयिल्लें आसतलें.
फुडें चलता…
मूळ लेखकः पुज्य साने गुरूजी
अणकारः पांडुरंग नाडकर्णी
पांडुरंग नाडकर्णी
9326139252
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
