भांगरभूंय | प्रतिनिधी
फोंडें, प्रतिनिधी ः पार- उसगांवांतल्या सर्विसिंग सेटर लागसार दुचाकी चलोवप्याक गाय मदीं आयिल्ल्यान मरण आयलें. संजय बाबलो पेडणेंकार (52, खांडेपार) अशें तांचें नांव.
सोमारा सकाळीं रस्त्यार मदीं आयिल्ले गायेक चुकोवपाचो यत्न करतना दुचाकी रस्त्यार पडून ती चलोवपी संजयाक मरण आयलें. तो एमआरएफ कंपनीचो कर्मचारी. रातची शिफ्ट करून सकाळीं तो घरा वतना हो अपघात जालो.
चड म्हायती प्रमाण, जीए-11- बी- 6451 क्रमांकाचे दुचाकी वयल्यान तो घरा वतालो. पार- उसगांवच्या एके वटेनच्या रस्त्यार अचकीत मदीं एक गाय आयली. तिका चुकोवपाच्या यत्नात तोल वचून दुचाकी रस्त्यार पडली. हांतूत दुचाकी चलोवपी संजय गंभीर जखमी जाले. तांकां पिळये मुळाव्या भलायकी केंद्रांत उपचारा खातीर व्हेले. पूण उपचारा वेळार तांकां मरण आयलें.
फोंडें पुलिसांनी अपघाताचो पंचनामो केलो. मजगतीं, फोंडें पुलीस वाठारांत अपघात सत्र चालू आशिल्ल्यान थळावे लोक हुस्को उक्तायतात. रस्त्यार भोंवपी गोरवांचोय बंदोबस्त करचो, अशी मागणी तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
