भांगरभूंय | प्रतिनिधी
गायत्री गोपिचंद आनी त्रिशा जॉली हे जोडयेचें सिंगापूर ओपन बॅडमिंटन सर्तींतल्यान आव्हान सोंपलें. सेमी फायनलींत भारताचे हे जोडयेचें आव्हान संवसारीक क्रमवारींत चवथे सुवातेर वयले नामी मात्सुयामा आनी चिहारू शिडा हे जपानाचे जोडये कडल्यान 23-21, 21-11 अशा फरकान हार घेवची पडली.
गायत्री आनी त्रिशा ही जोडी हारल्या उपरांत भारताचें सर्तींतलें आव्हान सोंपलें. सात्विकरेड्डी रंकिरेड्डी-चिराग शेट्टी, पी व्ही सिंधू आनी एच एस प्रणॉय हांचें आव्हान पयलींच सोंपलां.
बायलांच्या दोट्टी गटांतले सेमी फायनलींतली पयली गेम उमळशीक वाडोवपी थारली. दोनूय जोडयो एकेक गुणां खातीर संघर्श करतना दिसल्यो. जपानान तीन खेपे मॅच पॉयण्टाची संद व्हगडायली. पूण, भारताचे जोडयेन केल्ले चुकींक लागून जपानाचे जोडयेन पयली गेम जिखपाक येस आयलें. दुसरे गेमींत भारताचे जोडयेचेर चेपण दिलें. सुरवातीक दोन गूण घेतल्या उपरांत फाटीं पडत गेली. गायत्री-त्रिशान दुसरी गेम 21-11 फरकान हारली आनी हे हारी उपरांत तांचे सर्तींतलें आव्हान सोंपलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
