भांगरभूंय | प्रतिनिधी
मनशाक सदचे जिणेचो वाज येता. मागीर तो कितें तरी थ्रील, वेगळें करपाक सोदता. तें हेरां परस वेगळें आसल्यार आनी कोणे ताची तुस्त केल्यार ताका मळब चार बोटां उरता. मात, सगलेच अशें समाजाक उपेगी पडपी, मार्गदर्शन करपी कितें करताच अशें ना. दुसऱ्यांक उपद्रव थारतलो अश्यो गजाली करपाक थोड्यांक सूख भोगता. लोकांक त्रास, मनस्ताप जातलो, हाचें तांकां पडून गेल्लें नासता. हे हरफनमौला (म्हणल्यार सदांच खूश रावपी. कोंकणींत मौलाचो तसो वेगळोय अर्थ आसा.) लोक आपलेच धुंदींत जगतात. फोंड्यां आनी सरभोंवतणच्या वाठारांनी अशेच कांय तरणाटे आसात. माॅडिफायड मोटारसायकली तांच्या आवडिच्यो. आयतार वा सुटयेच्या दिसा ह्या दुचाकींच्या कान विटेवपी आवाजाक लागून लोकांक त्रास जातात. पूण, तांणी पुलिसांनी तांचेर खर कारवाय करपाची मागणी केल्या. आतां बाॅल पुलिसांच्या कोर्टांत आसा. पळोवया कितें करतात ते.
लोकांच्या म्हणण्या प्रमाण, कुट्टे उड्डाण पुलार रातच्या वेळार माॅडिफायड मोटारसायकलींची रेस लागता. ह्या वेळार तांचो व्हडलो आवाज येता. थंय अपघातूय जाल्यात खंय. हरशीं म्हूण चडशे तरणाटे नवे दुचाकेंत रोखडोच बदल करून घेतात. तातूंत तांकां कितें समाधान मेळटा तें कळना. पूण वयर सांगिल्लें प्रमाण, आपूण कोण तरी वेगळो म्हणटकच झेत मारपाक कितें तरी वेगळें करपाक जाय, लोकांची नदर आपले वटेन ओडून घेवपाक जाय, हे इत्सेन ते दुचाकी माॅडिफायड करतात. खाशेलो आवाज, हाॅर्न, फुडलो, फाटलो भाग… पळोवपाक दुचाकी आकर्शक दिसता. धांवताय वेगान. म्हणटकच अपघाताक निमंत्रण… आनी हे अपघात म्हणल्यार एक घाव दोन कुडके पद्दतीचे. फोंडें वाठारांत असल्यो दुचाकी वाडटात, अशें लोक म्हणटात. जाल्यार पुलिसांकूय तें खबर आसतलेंच. मागीर ते तांचे कडेन लक्ष कित्याक दिनात तर? मुळांत कंपनी कडल्यान विकत घेतिल्ले दुचाकेंत, गाडयेंत अशे बदल करपाक कायदो परवानगी दिता काय, हेंवूय पळोवचें पडटलें. कांय जाणांच्या मतान येरादारी कायदो 1988 आनी सेंट्रल मोटर व्हेईकल रुल्स खाला थारावीक भाग बदलपाक मेळटात! अशी गाडी माॅडिफाय करप योग्य काय अयोग्य हाचेर भासाभास जावप गरजेचें. पोरूं वेर्णें उद्देगीक वसणुकेंतूय सुटयेच्या दिसा गाडयांच्यो, मोटारसायकलींच्यो रेसी लागतात, अशी खबर बरीच गाजिल्ली. हेर कडेनूय गुपचूप रेसी जातात आसतल्यो. ह्यो फक्त थ्रील, कितें तरी वेगळेंपण म्हूण तरणाटे करतात काय हो पयशे बी लावन खेळिल्लो जुगार, ताचोय सोद पुलिसांक घेवचो पडटलो. हाचे फाटल्यान नेमके कोण आसात, थारावीक तरणाटे काय आनीक कोण? हाचोय तपास करचो पडटलो. मुळांत गोंयांत अपघातांक लागून वर्साक तिनशे ते साडेतिनशे लोक मरतात. चडशे तरणाटेच. ताचे तीन पट जखमी जातात. तातूंत ह्या रेसींक लागून आनीक भर पडप हें आमच्या तरणाट्या मनीसबळाचें लुकसाण थारतलें. राज्य, देशा खातीर हें मारक.
रेसी खातीर आसूं वा हेर कित्याय खातीर माॅडिफायड केल्ल्यो दुचाकी हालीं फोंड्यांच न्हय, तर मेळत थंय दिसपाक लागल्यात. त्यो वेगानूच चलोवपाक जाय, असो एक समज कांय तरणाट्यां मदीं आसा आनी ताका ते पाळो दितात. ह्या वेगाचेर येरादारी खातें, पुलिसूच नियंत्रण हाडूंक शकतात. मोटारींचे हारशे फिल्मींग करून काळे करपाचे प्रकारूय अजून चलतात. पुलीस मदींच केन्ना तरी ताचे आड मोहीम उक्ती करतात, पूण उपरांत असलीं वाहनां परत दिश्टी पडटात. इन्शुरन्स भरूंक नाशिल्ल्यो मोटारी, दुचाकीय वाडल्यात. पुलिसांनी तपास केल्यार तेंवूय उक्तडार येतलें. चार ते पांच फावटी तालांव पडूनय तो फारीक करूंक नाशिल्ले कितलेशेच जाण आसात. तेवूय सांपडटले. हें धाडस हांकां येता खंयच्यान? मंत्री, आमदार वळखीचो आसा, तो मजतीक धांवतलो, असो विस्वास बी तांकां नासता मूं? जांकां बेजापसालदार गाडयेकाराचो अणभव येता, माॅडिफायड मोटारसायकलीं वरवीं त्रास करपी सांपडटात, तेन्ना तांणी हो विशय लावन धरपाक जाय. एक दीस पेपरांत बातमी, लेख आयलो म्हूण कितें साध्य जातलेंच अशें ना. पुलीस कागाळी वाडल्यो जाल्यार तांकां, येरादारी अधिकाऱ्यांक वावराक लागचें पडटलें आनी तेन्नाच असले अतिशाणे गाडयेकार ताळ्यार येतले. गाडयो कसल्यो माॅडिफायड करतात, विचार करात न्हय!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
