भांगरभूंय | प्रतिनिधी
नवी दिल्ली, खबरां संस्थाः आतां गाडयो एकामेकांक धपको दिवचे पयलीं सावधान करपाक शकतल्यो. हाचे खातीर केंद्रीय रस्तो येरादारी आनी म्हामार्ग मंत्री नितीन गडकरी हांणी एक घोशणा केल्या. सरकार 2026 वर्साच्या निमाणे मेरेन देशांत ‘व्हीकल-टू-व्हीकल’ (V2V) कम्युनिकेशन तंत्रज्ञान सक्तीचें करपाची येवजण तयार करता.
28 राज्यांच्या आनी केंद्रशासित प्रदेशांच्या परिवहन मंत्र्यांची बसका जाले उपरांत हो निर्णय घेतला. 2030 मेरेन रस्त्याच्या अपघातांत मरण येवपी लोकांचो आंकडो 50 टक्क्यांनी उणो करपाचो सरकाराचो हेत आसा.
ही प्रणाली एकदां चालीक लायले उपरांत मळबांत पायलट जसो संवाद सादतात तसोच गाडयो एकामेकां कडेन संवाद सादपाक शकतल्यो. दरेक गाडयेंत एक ‘ऑन-बोर्ड युनिट’ (OBU) आसतले. हो युनिट वायरलेस तंत्रगिन्याना वरवीं आपल्या भोंवतणच्या हेर गाडयांक आपली सुवात, गती, दिका आनी ब्रेक लावपा सारकीं म्हायती धाडटलो. हाका लागून ड्रायव्हराक धोको दिसचे पयलीं अलर्ट मेळटलो.
कॅमेरे वा रडार काम करपाक शकना अशा परिस्थितींत V2V तंत्रज्ञान चड प्रभावी थारतलें. धुकें आनी धुंवर: दृश्टी उणी आसली तरी गाडयेन अचकीत ब्रेक लायला हें फाटल्यान आशिल्ल्या गाडयेक कळटलें. धोक्याचें ओल्त वा मुखारच्यान येवपी गाडयेचें सिग्नल पयलींच मेळटलो. रस्त्यार वाहन बंद पडलां वा उबें आसा जाल्यार ड्रायव्हराक पयसुल्ल्यान ताचो अलर्ट मेळटलो.
ADAS आनी V2V हातूंत फरक कितें?
हालींसराक जायत्या गाडयांनी ADAS (अॅडव्हान्स्ड ड्रायव्हर असिस्टन्स सिस्टिम) आसता जे कॅमेरे आनी सेन्सराचेर आदारून आसता. ताका फकत कॅमेऱ्या मुखार कितें आसा तें पळोवंक मेळटा. जंय V2V तंत्रज्ञान वायरलेस सिग्नलांचेर काम करता. हाचो अर्थ तुमच्या मुखार व्हडलो ट्रक वता आनी ताचे मुखार कांय धोको आसल्यार ADAS तो पळोवंक शकना, पूण V2V वरवीं मुखार आशिल्ल्या गाडयेचो सिग्नल ट्रकाच्या फुडें तुमचे गाडये मेरेन पावतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
