भांगरभूंय | प्रतिनिधी
गाझा, खबरां संस्था: इस्रायल आनी हमास हांचे मदीं चालू आशिल्ल्या झुजांत मरण आयिल्ल्या पॅलेस्टायनी लोकांचो आंकडो ४० हजारां परस चड जाला. गाझाच्या भलायकी मंत्रालयान १५ ऑगस्टाक हे विशीं अहवाल दिला. इस्रायलान गाझाचेर केल्ल्या हल्ल्यांत आतां मेरेन ९० हजारां परस चड लोक जखमी जाल्यात. हातूंत हमास आतंकवाद्यांचोय आसपाव केला. मरण आयिल्ल्यांचो आंकडो आनीक वाडपाक शकता. खुबश्यो कुडी आजूनय राशी पोंदाक आसात.
गाझाचें झूज ११ म्हयने चालूच
इस्रायल आनी हमास हांचे मदल्या झुजाक सुमार ११ म्हयने जाले. पोरूं ७ ऑक्टोबराक हमास आतंकवाद्यांनी इस्रायलाचेर हल्लो केल्लो. ह्या हल्ल्यांत सुमार १२०० इस्रायल नागरिकांक मरण आयलें. आतंकवाद्यांनी गाझा हांगा सुमार २५० जाणांक बंदखणींत दवरिल्ले.
इस्रायलच्या म्हणण्या प्रमाण, अजूनय १११ जाणांक हमासान बंदखणींत दवरल्यात. हातूंत ३९ मडीं आसात. बंदखणींत १५ बायलो आनी ५ वर्सां सकयली २ भुरगीं आसात. ७ ऑक्टोबराच्या हल्ल्या उपरांत इस्रायलान हमासाचेर झूज जाहीर केलें. ह्या झुजांत आतां मेरेन ३२९ इस्रायल सैनिकांक मरण आयलां.
इस्रायलच्या लश्करी दळाच्या म्हणण्या प्रमाण, तांणी आतां मेरेन १५ हजारां परस चड हमास आतंकवाद्यांक मारल्यात. झुजाक लागून गाझांतले सुमार १८ लाख लोक आपल्या घरांतल्यान पळून गेले. तशेंच इस्रायल आनी दक्षीण लेबनॉनांतल्यानय हजारांनी लोकांक घरांतल्यान पळून वच्चें पडलां.
५ लाख लोक उपाशीं पडपाचो धोको
झुजाक लागून गाझांत मानवतावादी संकश्ट निर्माण जालां. इस्रायच्या हल्यांचो परिणाम जाल्ल्या गाझाच्या नागरिकां मुखार उपाशी पडपाची समस्या निर्माण जाल्या. एका अहवाला प्रमाण फुडल्या म्हयन्यांत गाझांतल्या पांच लाख लोकांक जेवणाच्या संकश्टाक तोंड दिवचें पडटलें.
इस्रायलच्या हल्ल्यांक लागून गाझांतल्यो ५९% इमारती नश्ट जाल्यात. उत्तर गाझांत हो आंकडो ७०% परस चड आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
