गाझांत दर्यांत उडयिल्लीं जेवणाचीं पाकिटां मेळोवपाचो यत्न करतना 18 जाणांक मरण
भांगरभूंय | प्रतिनिधी
तेल अवीव, खबरां संस्था ः इस्रायल- हमास झुजाच्या काळांत 23 लाख लोकसंख्या आशिल्ल्या गाझा शारांत अन्ना संबंदी संकश्ट वाडत आसा. मंगळारा उत्तर गाझाच्या बीट लाहिया हांगा विमानांतल्यान सकयल उडयिल्लें अन्न मेळोवपाचो यत्न करतना 18 जाणांक मरण आयलें. न्यूयॉर्क टायम्सच्या म्हणण्या प्रमाण तातूंतले 12 जाण दर्यांत बुडले जाल्यार 6 जाणांक जमनीचेर मरण आयलें.
अमेरिकेन सोमारा गाझाक 80 अन्नाची पॅकेटां धाडिल्लीं अशें पेंटागॉनच्या प्रवक्ती सबरिना सिंग हांणी सांगलें. पॅराशूटांत इबाड जाल्ल्यान तीं उदकांत पडलीं. गरजेच्या वस्तूंच्या पुरवणेंतलो फकत पंचमांश वांटो गाझांत प्रवेश करता अशें मजत एजन्सींनी सांगलें. इस्राएलाचे हवाई आनी जमनींचेर हल्ले चालूच आसात. हाका लागून गाझाच्या कांय वाठारांनी दुकळा सारकी परिस्थिती निर्माण जाल्या.
जेवण घेवपाक आयिल्ल्या लोकांचेर फारपेट
मार्चाचे सुरवेक अमेरिकेन गाझाक पयली मजत केल्ली. अमेरिकेच्या लश्करी विमानान पॅलेस्टायनी लोकां खातीर जेवणाचीं पेटी पॅराशूट वरवीं सकयल उडयिल्ली. ती घेवपा खातीर लोक दर्यांत धांवतना दिसले. अमेरिकेंन 66 डब्यांतल्यान 38 हजार अन्नाची पॅकेट सोडिल्लीं.
इस्रायली सैनिकांनी 1 मार्चाक जेवण घेवपाक आयिल्ल्या पॅलेस्टायन लोकांचेर फारपेट केलो. हे घडणुकेचो फोटो- व्हिडियो सोशल मिडियाचेर व्हायरल जाल्यात. फारपेट जाल्ली सुवात दर्या लागसार आशिल्ली हें स्पश्ट दिसतालें. ह्या काळांत 112 जाणांक मरण आयिल्लें.
तशेंच ज्या ट्रकांतल्यान मजतीचें सामान आयिल्लें, तातूंतल्यान मेल्ल्या कुडींक आनी जखमींक हॉस्पिटलांत व्हेल्ले. संयुक्त राश्ट्रांच्या म्हणण्या प्रमाण गाझांतले 22 लाखां परस चड लोक उपाशीं पडपाचे वाटेर आसात. अल जझीराच्या म्हणण्या प्रमाण, ह्या झुजांत 32 हजारां परस चड पॅलेस्टायनींक मरण आयलां, जाल्यार 74 हजारां परस चड लोक जखमी जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
