भांगरभूंय | प्रतिनिधी
तेल अविव, खबरां संस्था : इस्रायल आनी हमासच्या झुजाक लागून आतां मेरेन हजारांनी लोकांक मरण आयलां. इस्रायल सरकारान मारतें घेवचें म्हूण हमासान इस्रायली बायलांक हुबारून व्हेल्यांत. दुसरे वटेन हमासाक धडो शिकोवपा खातीर इस्रायलच्या सैन्यान गाझा पट्टींत रावपी लोकांक आपल्या ताब्यांत दवरल्यात. इस्रायलच्या सेगीत चलिल्ल्या हल्ल्यांक लागून जखमी जाल्ल्या नागरिकांक गाझा पट्टींतल्या हॉस्पिटलांत दाखल केल्यात.
मजगतीं, इस्रायली सैनिकांनी गाझा पट्टींत जमनी वयल्यान हल्लो करून रसद तोडल्यार हॉस्पिटलांनी वीज, इंधन, वैजकी सामान, मुळाव्या गरजांची पुरवण बंद जावपाचो भिरांत संयुक्त राष्ट्रांनी उक्तायल्या. वीज आनी वैजकी सामानाच्या उणावाक लागून हजारांनी जखमी दुयेंतींक मरण येवं येता, अशी शिटकावणी गाझा हॉस्पिटलांतल्या दोतोरांनी इस्रायली सरकाराक दिल्या. तशेंच संयुक्त राष्ट्रांनीय गाझांतल्या पॅलेस्टीनी लोकां विशीं भंय उक्तायला.
संयुक्त राष्ट्र मानवतावादी कार्यालयान इस्रायल सरकाराक शिटकावणी दिल्या, गाझांतल्या हॉस्पिटलांतलें इंधन फुडल्या २४ वरांनी सोंपतलें. हाचो परिणाम म्हळ्यार दुयेतींचो जीव वतलो. इस्रायली सरकाराचे कारवाये उपरांत गाझाचे नागरीक जेवण, उदक आनी सुरक्षीत जाग्या खातीर भायर सरल्यात. भूंयमध्य दर्यांत अमेरिकेच्या झुजारी बोटींचो आंकडो वाडला. गाझाचे शिमेचेर इस्रायली सैन्य तैनात केलां. हमासाक बुद्द शिकोवपाक इस्रायल आतां जमनी वयल्यान हल्लो करपाचे तयारेंत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
