भांगरभूंय | प्रतिनिधी
मुख्यमंत्री : कोयर उडोवप्यांक 10 हजार दंडाची शिटकावणी
भांगरभूंय । प्रतिनिधी
दिवचल : सांखळी पंचायतींतल्या न्हावेली वाठारांत सरकारान 78 लाख रुपया खर्च करून एमआरएफ शेड उबारल्या. आतां आपलो गांव सुंदर आनी नितळ दवरपाची जापसालदारकी दरेकल्याची आसा. कोयरा संबंदांत सरकारान कायदो अदीक खर केला. हाचे मुखार खंयचीय गाडी आपल्या गांवांत कोयर उडयतना दिसल्यार थेट पुलिशे कडेन संपर्क करीन ते गाडयेचो नंबर दिवचो. ते खातीर कोणाकूच हमीदार रावपाची गरज ना. पुलीस ते गाडयेच्या चालकाक अटक करून गाडी लेगीत जप्त करतले. अश्या गाडयांक हाचे मुखार 10 हजार रुपयांचो दंड दितले. एकूच गाडी जर तीन खेपे कोयर उडयतना सांपडली जाल्यार ते गाडयेचो परवानो रद्द करून पुलीस ती गाडी कायमची जप्त करतले, अशी म्हायती मुख्यमंत्री डॉ. प्रमोद सावंत हांणी दिली.
सांखळी मतदारसंघांतल्या न्हावेली पंचायतींत उबारिल्ली एमआरएफ शेड आनी नुतनीकरण केल्ल्या सभाघराच्या उक्तावण सुवाळ्यांत मुख्यमंत्री उलयताले. ह्या वेळार सरपंच रोहिदास कानसेकार, उपसरपंच कल्पना गांवस, पंच कालिदास गांवस, नारायण गांवस, रितिका गावडे, अन्शी नायक, प्रसाद नायक, बीडीओ ओमकार मांजरेकार, देवस्थानचे अध्यक्ष विश्वंभर गांवस, न्हावेली कोमुनिदादचे अध्यक्ष सिद्धांत रमेश गांवस, मुखत्यार अवधूत गांवस, भांडारी सखाराम गांवस आनी हेर मान्स्त हाजीर आशिल्ले.
न्हावेली गांवांत एमआरएफ शेड उबारचे खातीर जमनीची गरज आशिल्ली. ते खातीर न्हावेली कोमुनिदादीन जमीन दिवन गांव नितळ आनी सुंदर दवरपाक मोलाचो आदार केला. आतां लोकांनी स्वता हो गांव सुंदर आनी नितळ दवरचे खातीर स्वताची जापसालदारकी वळखून आपल्या घरांत तयार जावपी सगले तरेचो कोयर खंयचेय मेकळे सुवातेंत वा रस्त्या कुशीक उडयनासतना थेट पंचायतीचे सुवादीन दिवचो, असो उलो मुख्यमंत्री डॉ. सावंत हांणी मारलो.
सरपंच रोहिदास कानसेकार हांणी येवकाराच्या उलोवपांत न्हावेली पंचायत वाठारांत आतां मेरेन मुख्यमंत्र्यांच्या आदारान केल्ले उदरगतीची म्हायती दिली. मुख्यमंत्र्यांचे हस्तुकीं नांव तकट्याचें अनावरण, फीत कापून तशेंच डिजिटल पद्दतीन एमआरएफ शेड आनी नुतनीकरण केल्ल्या सभाघराचें उक्तावण केलें. पंच कालिदास गांवस हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
