भांगरभूंय | प्रतिनिधी
पणजीः कोंकणी नाटक ‘गांव जाला जाण्टो’ एका दिसांत सगळ्यांत चड प्रयोग करपाचो संवसारीक विक्रम करपाचो यत्न करतले. ते प्रमाण ह्या नाटकाचे 7 प्रयोग 18 मेक फोंडेंच्या राजीव गांधी कला मंदिरांत सकाळीं 7.30 ते 10.30 मेरेन जातले.
हे प्रयोग फुकट आसात अशी म्हायती अभिनेतो राजदीप नायक हांणी दिली. मंगळारा पणजेंत जाल्ले पत्रकार परिशदेंत ते उलयताले. ह्या वेळार सुचिता नार्वेकार, राजेश लोहिया, सायली कुडतरकार आनी हेर कलाकार हाजीर आशिल्ले.
हें नाटक कला चेतना, वळवय ही संस्था घडोवन हाडटले. तशेंच हे नाटक वर्ल्ड रेकॉर्ड बुक्स ऑफ इंडिया हातूंत विक्रम करपाचो यत्न करतले. आदलो संवसारीक विक्रम मराठी नाटकाच्या नांवान आसा. तांणी ऑगस्ट म्हयन्यांत मुंबयंत सेगीत स प्रयोग केल्ले.
आमी सात प्रयोग करतले. पयलो प्रयोग सकाळीं 7.30 वरांचेर सुरू जातलो. नाटकाचो काळ दोन वरां आसा. एक प्रयोगा उपरांत फुडलो प्रयोग अर्द वर उपरांत सुरू जातलो. निमाणो प्रयोग रातच्या 10.30 वरांचेर सुरू जातलो अशें नायक हांणी सांगलें.
म्हादय न्हंयचे देगेर आशिल्ल्या गांवांचो, सैमाकडेन तांचो संबंद, शारीकरणाक लागून खंडीत जावपी समाजीक जिणे पद्दतीचो ह्या नाटकांत आस्पाव जाता अशें सुचिता नार्वेकार हांणी सांगलें. गोंयचो फुडार म्हाडायच्या व्हांवपी प्रवाहाचेर आदारून आसा. तो थांबलो जाल्यार सगळें सोंपता असो संदेश ह्या नाटकांतल्यान दिलां. सगल्या गोंयकारांनी आनी म्हादाय मोगी लोकांनी ह्या नाटकाक हाजीर रावून संवसारीक विक्रम करपाक मजत करची. रेकॉर्डाच्या दिसा 5 वर्सां पिरायेचें भूमि नायक नार्वेकार 5 ते 7 प्रयोगांत अभिनय करतले.
नांव नोंदणी करप गरजेचें –
नाटकाचो प्रयोग फुकट आसलो तरी आदींच नोंदणी करप गरजेचें अशें सायली कुडतरकार हांणी सांगलें. हाचे खातीर www.kalachetanavolvoi.com ही संकेतथळ वापरची. इत्सूक प्रेक्षकांनी नाटका खातीर स्वेच्छा अर्थीक योगदान दिवंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
