भांगरभूंय | प्रतिनिधी
आमचो गांव आतां आमचो उरुंक ना. गांवांत जालें जायतें घांटी. गांवकारांक फाटीं उडोवंक करूंक लागले आपल्यो राटी (राटावळी). तंबाकू आनी गुटको आमच्या गांवांत तांणीच हाडलो. आपूण खातात ते खातात थोड्या गांवकारांकूय खावंक शिकयलो. वचत थंय ते तंबाकू, गुटको खावन थुकूंक लागले. तें पळोवन आमच्या गांवचे काळीज दुखूक लागलें. गांवची ती अवतिकाय पळोवन गांवच्या थोड्या गांवकारांच्या दोळ्यांतलीं दुकां सुकूंक लागलीं.
भायल्यांनी आपल्या सोयर्यांक, इश्टांक आमच्या गांवांत हाडलें. गांवांतली चडशीं घरां भाड्यान घेवन रावूंक लागले. आपल्या रिकामी घरांचो भरपूर पयसो मेळटा म्हणून घरधनी खूश जाले. थोड्याच तेंपान भाडेकार घर आपलें करून, आपूणच घर मालक जाले.
देखून म्हणटा ‘गांव जाला जाण्टो’. पूण सांगपाचें म्हणल्यार गांव केन्ना जाण्टो जायना. गांव भुरगोच आसता. आमचे नदरेक तो जाण्टो दिसता. कित्याक तर आमची नदर जाण्टी जाल्ली आसता. आमचें मन, आमचें काळीज, जाण्टें जाल्लें आसता. पूण ‘गांव जाणा- तो’. तो सगलें जाणा आसता. गांवान खूब कितें पळयल्लें असता, सोंसलेलें आसता, भोगलेलें आसता. गांवांतली शेतां जीं गांवची उदरगत जावन आसा, तीं पुरोवन बिल्डिगो बांदतना गांवान पळयलां, दोंगर, रानां फोडून त्या जाग्यार काँक्रिटाचीं रानां जातात तीं पळयल्यात.
उदरगतीच्या नांवान भ्रश्टाचार जातना ताणें पळयला. तो कोणे केला तोय ताणें देखला. गांवांतले रस्ते, सरकारी शाळा, भौशीक शौचालय, तळयो, बांयो हांचे निर्मणे खातीर जाता तो भ्रश्टाचार ताचे नदरेतल्यान सुटूंक ना. आयज, काल प्रामाणीकपणान कोणूच काम करिनात. प्रत्येक कामांत आपलो स्वताचो फायदो सोदतात. अशें परिस्थितीन जे कोण म्हणटात ते प्रमाण गांव जाण्टो जावचो ना तर कितें…! पूण ताका जाण्टो जावप म्हणना. तें ‘गांव जाला जाण्टो’ न्हय. तर ‘गांव जाला जाणा- तो’.
अविनाश कुंकळकार
7875237830
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
