भांगरभूंय | प्रतिनिधी
भांगरभूंय । प्रतिनिधी
वाळपयः भाजपाच्या गांव चलो अभियनाच्या माध्यमांतल्यान गांवा गांवांनी वचून साबार लोकांच्या समस्या समजून घेवपाची संद मेळटा. लोकांक कडेन सुसंवाद करपाक मेळटा. हें अभियान साबार घटकाचे उदरगती खातीर म्हत्वाचें आसा अशें पर्येची आमदार डॉ दिव्या राणे हिणे सांगलें. भिरोंडा पंचायत वाठारांत ताणी बुध पांवड्यार बसका घेवंन लोकांच्या समस्या आयकून घेतल्यो.
बसकांक भिरोडेचो सरपंच उदयसिंग राणे, उपसरपंच मनिषा पिळयेकार, पंच वांगडी रंजना राणे,रुपाली गांवकार, किरण गावडे आशिल्लो. भिरोंडा, अडवय, वांते, पाडेली हांका बसका जाल्यो. भाजपाच्या केंद्र आनी राज्यांतल्या सरकारांक लागून गोंयच्या गांवगिऱ्या वाठाराची उदरगत करपाची संद फावो जाल्या. सध्या दिसान दीस बदलपी जिणे शैलीक लागून आमची संस्कृती आनी परंपरा तिगोवन दवरप गरजेचें जालां. गांवगिऱ्या वाठारांतले लोक हें काम बरे तरेन करतात तशेंच ह्या वाठाराचे उदरगतीक चालना दिवप तितलेंच म्हत्वाचें आसा अशें डॉ राणेन सांगलें.
फाटल्या दोन वर्सांत पर्ये मतदारसंघातल्यो बऱ्योच समस्या सुटाव्यो केल्यात. दरेका पंचायत वाठारांत चोवीस वरां पियेवपाचें उदक मेळचें हे खातीर म्हजे यत्न सुरू आसात. साबार लोकांक थाकाय दिवपी सरकार भाजपान लोकांक दिला. येता ते लोकसभा वेंचणुकेंत लोकांनी भाजपाच्या फाटल्यान रावंन नरेंद्र मोदी हांका देशाची उदरगत करपा खातीर परत एक फावट पंतप्रधानपदाचे खुर्चेर बसोवपाक जाय अशे तिणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
