भांगरभूंय | प्रतिनिधी
नवी दिल्ली, खबरां संस्था ः भारतांत फाटल्या वर्सा गावगिऱ्या गरिबींत व्हड प्रमाणांत उणाव आयला आनी पयलेच खेपे गरिबीचें प्रमाण 5 टक्क्यां सकयल देंवलां. ही म्हायती एसबीआय रिसर्चाच्या विश्लेशणांतल्यान दिसून आयलां. गांवगिऱ्या वाठारांतल्या खर्चांत व्हड प्रमाणांत वाड जाल्ल्यान फाटल्या वर्सांच्या 7.2 टक्क्यां परस 2023-24 वर्सां गांवगिऱ्या वाठारांतली गरिबी 4.86 टक्क्यां मेरेन देंवल्या. विशेश म्हणल्यार 2011-12 वर्सा हो आंकडो 25.7 टक्के आशिल्लो. ही म्हायती हालींच जाहीर केल्ल्या एसबीआय अहवालांत दिल्या. शारी वाठारां विशीं, अर्थीक वर्स 2023 वर्सा गरिबी 4.6 टक्क्यां वयल्यान 2024 वर्सा 4.09 टक्क्याचेर पावली.
2021 वर्साची जनगणना पुराय जातकच आनी नव्या गांवगिऱ्या-शारी लोकसंख्येचो वांटो थारायल्या उपरांत ह्या आंकड्यांनी सुदारणा जावंक शकता. हाचे वांगडाच शारांतल्या वाठारांतली गरिबी आनीक उणी जावं येता अशेंय अहवालांत म्हणलां. हाचे वांगडाच भारतांतलें गरिबीचें प्रमाण सध्या 4 टक्के ते 4.5 टक्क्यां मदीं आसूं येता आनी तातूंत अत्यंत गरिबी सामकी उणी आसूं येता अशें आरबीआय रिसर्चान सांगलां.
गांव आनी शाराचें अंतर उणें जालां….
शारी वाठारांनी मुळाव्यो साधनसुविधां वाडत आसा, जाका लागून गांवगिऱ्या आनी शारी वाठारां मदलो फरक उणो जाला असो दावो अहवालांत केला. तशेंच गांवगिऱ्या वाठारांनी उत्पन्नाची असमानता उणी जायत आसा. गांवगिऱ्या आनी शारांतलो अंतर उणो जावपाचें आनीक एक कारण म्हळ्यार सरकारी येवजण्यां कडल्यान जावपी अर्थीक मजतीची थेट हस्तांतरण अशें म्हणटात.
गांवगिऱ्या आनी शारांनी मंथली पर कॅपिटा कंजम्शन एक्सपेंडिचर (MPCE)मदलो फरक नेटान उणो जाला. एमपीसीई 2009-10 वर्सा 88.2 टक्के आनी 2022-23 अर्थीक वर्सा 71.2 टक्के आशिल्ली. जें आतां अर्थीक वर्स 2024त 69.7 टक्क्यांनी उणें जालां. हो फरक डीबीटी, गांवगिऱ्या मुळाव्या साधनसुविधांचेर लक्ष केंद्रीत करप, शेतकारांचें उत्पन्न वाडोवपाचे यत्न आनी गांवच्या जिणेच्या दर्ज्यांत नेटान सुदारणा हाका लागून जाला अशें अहवालांत सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
