भांगरभूंय | प्रतिनिधी
आमी गांवांत रावपी. पूण गांव आतां गांव उरलो ना. आयज सगळें बदलत चल्लां. गांव आनी तातूंत रावपी लोक सुद्धा बदलपाक लागल्यात. हो बदल आयला तो खरोच बरो काय? कारण बदल येवप हो सभावीक. दर गजाल बदलत आसता. पूण ह्या सगळ्या भितर आमी आमचें मनीसपण सुद्धां विसरत वतना आमकां दिश्टी पडटा.
गांव म्हळ्ळो की आमच्या दोळ्यां मुखार येता तें म्हळ्यार सादे भोळे लोक. कितलेय जरी एकामेकां कडेन झगडले तरी सुद्धा एकामेकांक गरजे वेळार पावपी. हो सभाव आमकां शारांत रावपी लोकां मदीं पळोवपाक मेळना. कारण जशीं शारांत घरांचीं दारां बंद आसतात तशें तांचीं मनांचीं दारां लेगीत बंद आसतात, अशें म्हळ्यार अतिताय न्ही.
गांवांत हो बदल आयलो कसो कांय? आधुनिकीकरणांक लागून आयलो काय? कारण एकामेकांक जीव लावपी लोक आतां परकी लोकां बशेन वागतना दिश्टी पडटा. गांवांत एक पयलीं रीत आशिल्ली. कोणाल्याय घरांत कितेंय बरें रांदल्यार आपल्या शेजाराक थोडें दिताले. तशेंच खंय वतना घरांची चावी शेजाराक दिवन ‘मात्शें घर सांबाळांत आं’ म्हूण सांगूंन वतालीं. गांवांतल्यो कांय बायल्यो एकठांय जावन आंगणात खबऱ्यो मारपाक बसताल्यो आनी तांचीं भुरगीं सरभोंवतणी खेळटात तीं आमकां पळोवपाक मेळटालीं. पूण ही रीत आतां गांवांनी आमकां पळोवपाक मेळना .
गांवांत बदल आयला खरो आनी तो बदलाव चडसो आमकां तरणाट्या भुरग्यां मदीं चड पळोवपाक मेळटा. हाचें एक मूळ कारण मोबायल, टीवी आसूं येता. आदले काळार अशें तरेचीं साधनां लोकां कडेन नाशिल्लीं. ताका लागून लोक एकामेकां कडेन मिसळून आपलो वेळ घालयताले. आमी हो बदलाव आपणायलो खरो. पूण जें मुळ गांवांतलें आपलेंपण आपणावपाक जाय आसलें, तें आपणायलें ना. बदल हाडप हो चूक न्हय. पूण आपलीं मुळां विसरप हें चुक. गांवांत आतां गांवपण ना जायत चल्लां. हें गांवपण फुडाराक तिगोवन दवरप खूब कठीण जातलें..
गौतम पागी
9637181710
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
