भांगरभूंय | प्रतिनिधी
किशोर नायक गांवकारः आगरवाड्यार ज्येश्ठ नाट्य कलाकारांचो सत्कार
भांगरभूंय । प्रतिनिधी
पेडणें: संस्कृती संवर्धना वांगडाच गांवाच्या अस्तित्वा खातीर सगळ्यांनी एकठांय येवपाची गरज आसा, अशें ज्येश्ठ पत्रकार किशोर नायक गांवकार हांणी सांगलें.
आमगरवाडो सार्वजनीक गणेशोत्सव मंडळा वतीन गणेश जयंती निमतान आयोजीत केल्ल्या ज्येश्ठ नाट्य कलाकारांचो सत्कार सुवाळो आयोजीत केल्लो. ह्या सुवाळ्यांत नायक गांवकार मुखेल सोयरे म्हूण उलयताले. तांचे वांगडा माचयेर खाशेले निमंत्रीत म्हूण आदले सरपंच तशेंच सध्याचे पंच बाळा उर्फ प्रशांत नायक, पार्सेचे आदले सरपंच तशेंच प्रभुदेसाय फावंडेशनाचे विश्वस्त देवेंद्र प्रभुदेसाय, मंडळाचे अध्यक्ष बाबली राऊत, महिला अध्यक्ष विद्या हणजूणकार हाजीर आशिल्ली.
नायक गांवकार हांणी सांगलें, गणेशोत्सव मंडळांनी फकत गणेश उत्सवा पुरतेच मर्यादीत रावनासतना वर्सभर गांवांत ह्या ना त्या मार्गान वावर चालूच दवरचो. आयज ह्या मंडळान ज्येश्ठ नाट्य कलाकारांचो सत्कार आयोजीत करून कलेक सन्मान दिला. नाट्य कला ही मनरिजवणे वांगडाच जनजागृतीचें प्रभावी माध्यम आसा. ते वरवीं एकठांय येवन उदरगतीच्या नांवाचेर भकास जावपी गांवाचें अस्तित्व तिगपाक जाय.
बाळा नायक हांणी सांगलें, कला सांबाळपी कलाकारांचो सत्कार हें पुण्याचें काम. गणेशोत्सव मंडळांनी अशे सत्कार घडोवन हाडचे जे वरवीं फुडले पिळगेक ही गिरेस्त संस्कृती कळटली. समाजीक दिश्टीकोन वाडीक लागचे खातीर उपक्रम चालीक लावपाचीय तांणी सुचोवणी केली.
हौशी माचये वयल्या ज्येश्ठ कलाकारांचो सत्कार घडोवन हाडिल्ले खातीर देवेंद्र प्रभुदेसाय हांणी आयोजकांक परबीं दिलीं.
ह्या सुवाळ्यांत मानेस्तां हस्तुकीं संतोष श्रीधर चोडणकार (मरणा उपरांत), जनार्दन नामदेव नायक (मरणा उपरांत), दामोदर श्रीधर दामाजी (मरणा उपरांत), आनंद महादेव कोरगांवकार, अनील विठोबा राऊत, राजेंद्र घनश्याम नायक, दिगंबर जगन्नाथ मसुरकार, रामनाथ सदाशिव बगळी, रमाकांत अर्जून राऊत, प्रभाकर सीताराम नागवेंकार (सर्व नाटय कलाकार), विठोबा उद्धव बगळी (पेडणें म्हाल शेतकरी सहकारी सोसायटीच्या अध्यक्षपदार निवड जाल्ले खातीर), उमेश महादेव आगरवाडेकार (नाटक सर्तींत इनाम मेळयल्ले खातीर) सत्कार केलो. ह्या वेळार मंडळाचे अध्यक्ष बाबली राऊत हांणी मानेस्तांक यादस्तीक चिन्न भेटयलें. हेमंत गोसावी हांणी सुत्रसंचालन केलें. सुदन नायक हांणी उपकार मानले. ते उपरांत आगरवाडा सार्वजनीक गणेशोत्सव हौशी नाटय मंडळा वतीन ‘देवता’ नाटक सादर केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
