भांगरभूंय | प्रतिनिधी
मोरजी ग्रामसभेंत थाराव मंजूर; रशियन भाशेंतले बोर्ड काडपाचीय मागणी
भांगरभूंय । प्रतिनिधी
पेडणें : मोरजी पंचायत वाठारांतल्या हॉटेलांचेर रशियन बोर्ड लावपाचें प्रमाण वाडलां. तांचेर कारवाय करची, अशी मागणी मोरजी ग्रामसभेंत लोकांनी केली. ताचेर सरपंच पवन मोरजे हांणी संबंदीत धनयांक रशियन भाशे बदला कोंकणी, मराठी, इंग्लिशेंत बोर्ड लावपाची सुचोवणी करपाचें उतर दिलें. ते भायर तेमवाडो मोरजी दर्यादेग वाठारांत पर्यटन खात्या खाला जो पार्कींग वेवस्था प्रकल्प उबारतात तो सरकारी कायद्या प्रमाणूच उबारचो, अशी सुचोवणी लोकांनी केली तशेंच उदकाचे समस्येचेर चर्चा जाली. हे ग्रामसभेंत गांवांत 25 मिटर रूंद रस्ते नाकाच असो थाराव मंजूर केलो.
सरपंच पवन मोरजे हांचे अध्यक्षते खाला जाल्ले ग्रामसभेंत उपसरपंच सुप्रिया पोके, पंच मंदार पोके, रजनी शिरोडकार, स्वप्नील शेट गांवाकर, सुरेखा शेट गांवकार, फटू शेटगांवकार, विलास मोरजे, मुकेश गडेकार माचयेर हाजीर आसले.
सुरवेक शिरगांवचे श्री लयराई देवीचे जात्रेंत ज्या भाविकांक मरण आयलां तशेंच भारत – पाकिस्तान झुजांत जे जवान अमर जाले तांकां आर्गां ओंपलीं. पंचायत सचीव धावसकार हांणी फाटले सभेचो इतिवृतांत वाचून कायम केलो. ह्या वेळार पंचायतीच्या जमाखर्चाक आनी अर्थीक बजेटाक मंजुरी दिली.
पंचायत वाचपघराची आवतिकाय जाल्या. थंय फकत दिसाळींच उपलब्ध आसात, हेर पुस्तकां कित्याक ना, असो प्रस्न सुभाष शेटगांवकार हांणी उपस्थीत केलो. मरडी वाड्या पांच वर्सां सावन नळाक उदक येना. उदकाचे पायपलायनीचेर कोणेय बांदकामां बी केल्यात काय कितें, असोय प्रस्न तांणी उपस्थीत केलो. पंचायत कर्मचारी वेळार कामार येनात, तांचेर नियंत्रण दवरचें. मुख्य जंक्सनाचेर सीसीटीव्ही कॅमेरे बसोवचे, अशी मागणी लोकांनी केली. तेचवरी व्हड प्रमाणार खाजगी गाडयो भाड्याक दितात, पंचायत तांचेर कसली कारवाय करतली, असो प्रस्न एकल्यान उपस्थीत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
