भांगरभूंय | प्रतिनिधी
दामू नायक : दाबोळी मतदारसंघांत कार्यकर्त्यांचो मेळावो
भांगरभूंय । प्रतिनिधी
वास्को : पक्ष घटमूट करात हो संदेश दिवचे खातीर तशेंच संघटन वाडोवप हो हेतू मुखार दवरून कार्यकर्त्यांचें वेगवेगळ्या वाठारांनी मेळावे आयोजीत करतात, अशें भाजप प्रदेशाध्यक्ष दामू नायक हांणी सांगलें. गांवांतल्या कार्यकर्त्यांक मुख्य प्रवाहांत हाडपाचो आपलो यत्न आसा, अशें तांणी स्पश्ट केलें.
दाबोळी मतदारसंघांतल्या भाजप मंडळ आनी बूथ कार्यकारिणी, पदाधिकारी आनी वांगड्यांचो मेळावो चिखली पंचायत घराच्या सभाघरांत शेनवारा 22 मार्चाक आयोजीत केल्लो. ह्या वेळार दामू नायक उलयताले. तांचे वांगडा पंचायत मंत्री मॉवीन गुदिन्हो, खासदार सदानंद शेट तानावडे, दाबोळी मतदारसंघाचे भाजपा प्रभारी जयंत जाधव, मंडळ अध्यक्ष सचिन चौगुले तशेंच हेर मानेस्त हाजीर आशिल्ले. ह्या वेळार नवे कार्यकारिणी पदाधिकारी आनी वांगड्यांचो भोवमान केलो. तेचवरी नायक हांचोय सत्कार केलो.
आमी सगळ्या मतदारसंघांतल्या कार्यकर्त्यांक मेळटले. तशेंच 2027 त 27 ही घोशणा आमी कार्यकर्त्यां मेरेन व्हरतले. उदरगत कामांच्या आदाराचेर ही घोशणा दिल्या. 100 दिसां भितर गोंयांतली भाजपा मंडळां, बूथ, दक्षीम आनी उत्तर गोंय जिल्हो कार्यकर्त्यांक मेळटले, अशे नायक हांणी स्पश्ट केलें.
मॉवीन गुदिन्हो हांणी सांगलें, मेळाव्याक व्हड प्रतिसाद मेळिल्ल्यान आपूण भारावन गेला. आपले मतदार, आपले कुटुंब हें नजरे मुखार दवरून तशेंच भाजपाचो एक कार्यकर्तो ह्या नात्यान आपूण फुडें पावलां मारता. कांय जाण आपल्याचेर नकारात्मक टिका करता, तांकां आपूण जाब दिना. तांचे टिकेन आपल्याक आनीक शक्त मेळटा, अशें तांणी सांगलें.
लोकसभा वेंचणुकेंत आमचें गणीत चुकलें आनी दक्षीण गोंयची वेंचणूक हारले. आपल्या कार्यकर्त्यांचेर आपल्याक पुराय विस्वास आसा. कार्यकर्त्यांच्या नेटारूच आमी 2027 त 27 ही घोशणा दितात, अशेंय मंत्री गुदिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
