भांगरभूंय | प्रतिनिधी
रमेश तवडकारः फुडल्या कांय वर्सांत काणकोणचो एकलोय मनीस घरा बगर उरचो ना
काणकोण/ पेडणें: गांवपण आनी गांवांतलें मनीसपण सांबाळचे खातीर श्रमदानांतल्यान घरां बांदतां. कांय वर्सां उपरांत काणकोण मतदारसंघांत एकूय मनीस ताच्या स्वताच्या घरा बगर आसचो ना. ते खातीर ही संकल्पना श्रमदाना वांगडाच कार्यकर्त्यांनी चालीक लायल्या, अशी म्हायती काणकोणचे आमदार तशेंच सभापती रमेश तवडकार हांणी दिली.
सभापती तवडकार हांणी जांकां स्वताचें घर ना अशा 100 परस अदीक जाणांक श्रमदानांतल्यान पक्की घरां बांदपाचो संकल्प केला. तातूंतली 15 घरां 20 मे आदीं बांदून पुराय जातलीं आनी तांच्यो चावयो संबंदितांक भेटयतले, अशें सभापती तवडकार हांणी पत्रकारां कडेन उलयतना सांगलें.
ह्या घरांचें बांदकाम कशे पद्दतीन श्रमदानांतल्यान करतात, ताची प्रत्यक्ष पळोवणी करून कांय आमदारांनी म्हायती घेतली. तांचे मदीं पेडणेंचे आमदार प्रवीण आर्लेकार, दिवचलचे आमदार डॉ. चंद्रकांत शेट्ये, नावेलीचे आमदार उल्हास तुयेंकार आनी वास्कोचे आमदार दाजी साळकार हांचो आस्पाव आशिल्लो. तांणी सभापती तवडकार हांचे हाजिरेंत बांदकाम चालू आशिल्ल्या घरांची पळोवणी केली. तांणी कांय वेळ श्रमदान केलें आनी जे लोक खोंपींनी कशे तरेन रावतात तांची म्हायतीय समजून घेतली.
आर्लेकार हांणी सांगलें, सभापती तवडकार हांणी जे तरेन घरां बांदल्यांत तीं पळयत जाल्यार तांणी थेट लोकांच्या काळजांत घर केलां. आपूण लेगीत आपल्या मतदारसंघांत अशीं घरां बांदपाचो यत्न करतलों, पूण पयलीं वानमारे, कातकरी समाज आसा त्या समाजाक पक्की घरां बांदून दिवचे खातीर यत्न करतलों.
डॉ. शेट्ये हांणी सांगलें, सगळ्या मळांचेर उदरगत करपाक जाय जाल्यार शिक्षणाकूय तितलेंच म्हत्व दिवपाक जाय. गांवांतलो एकादो तरणाटो वेवसायांतूय उदरगत करता. सभापती तवडकार हांणी जे तरेन श्रमदानांतल्यान घर बांदपाची येवजण आंखल्या तिका मोल ना. अशीच येवजण दरेका आमदारान चालीक लावची, असो तांणी उलो मारलो.
तुयेंकार हांणी सांगलें, सभापती तवडकार हांच्या मनांतली संकल्पना म्हणल्यार मनीसवणाचो वझरो आशिल्ली व्यक्तीच अशी येवजण चालीक लावपाक शकता.
साळकार हांणी सांगलें, मनीसपण सांबाळचे खातीर जांकां घरां नात अशा लोकांक आलाशिरो दिवपाची येवजण सभापती तवडकार हांणी चालीक लावन पुराय गोंयांत एक बरो पांयडो रचला. ही येवजण दरेकल्यान आपापल्या मतदारसंघांत चालीक लावची.
ह्या वेळार आमदार आर्लेकार, डॉ. शेट्ये, तुयेंकार आनी साळकार हांणी दरेकी एक लाख रुपया ह्या घराचे येवजणे खातीर जाहीर केले. ह्या वेळार पैंगीणची सरपंच सविता तवडकार, शमी दाजी साळकार, खोतीगांवचे सरपंच आनंदू देसाय, भाजपा सरचिटणीस विशांत गांवकार, थळावे कार्यकर्ते उल्हास गांवकार, प्रभाकर गांवकार आनी हेर मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
