भांगरभूंय | प्रतिनिधी
नोंदणी करिनात तांचेर कारवाय करपाची मंत्री नीळकंठ हळर्णकार हांची शिटकावणी
भांगरभूंय | प्रतिनिधी
पणजीः घरांत गांवठी सुणी पोसप्यांचेर सरकारान खर निर्बंध घालपाचो निर्णय घेतला. जे लोक पोशिल्ल्या गांवठी सुण्यांची पशु संवर्धन खात्या कडेन नोंद करिनात आनी सुण्यांचे पेटे रस्त्यार सोडटात, तांकां दंड दिवपाचो निर्णय सरकारान घेतला. रस्त्याद सुण्यांचो सर्व्हे करून तांचे संख्येचेर नियंत्रण दवरपा विशींचो आराखडो तयार करतले अशें पशु संवर्धन मंत्री नीळकंठ हळर्णकार हांणी सांगलें.
मंत्रालयांत शुक्रारा मंत्री हळर्णकार हांच्या फुडारपणा खाला रस्ताद सुण्यांच्या निर्बिजीकरणा विशीं बसका जाली. ह्या वेळार विरोधी पक्ष फुडारी युरी आलेमांव, विरोधी तशेंच सत्ताधारी आमदार आनी एनजीओ हाजीर आशिल्ले.
बसके उपरांत म्हायती दितना मंत्री हळर्णकार हांणी सांगलें, फाटल्या विधानसभा अधिवेशनांत रस्त्याद सुण्यां विशीं धोरण हाडपाचें आस्वासन दिल्लें. हो गंभीर विशय आशिल्ल्यान आमी विरोधी तशेंच सत्ताधारी आमदार आनी एनजीओ हांकां सुचोवण्यो दिवपा खातीर आपयिल्ले. रस्ताद सुण्यांचे निर्बिजीकरण करून तांची संख्या वाडची न्हय हो महत्वाचो मुद्दो आशिल्लो. निर्बिजीकरणा खातीर खातें पंचायतीक निधी दिता, पूण तो ह्या कामा खातीर पावना अशी कागाळ एनजीओंनी केल्ली. देखून चडांत चड निर्बिजीकरण करपा खातीर दुसरो पर्याय कितें आसपाक शकता हे विशीं एनजीओंनी आपल्यो सुचोवण्यो दिल्यात, अशी म्हायती हळर्णकार हांणी दिली.
ह्या सप्तका भितर तांणी दिल्ल्या सुचोवण्यांची चाचपणी करतले. ताचे वांगडा सुणें धरपी आनी हेर वावुरप्यांक वांगडा घेवन रस्त्याद सुण्यांचो सर्व्हे करतले. हे विशींचो आराखडो तयार करून फुडली प्रक्रिया आमी चालीक लायतले. रस्ताद सुण्यांचे निर्बिजीकरण करून सुण्यांच्या जल्माचेर कशें नियंत्रण येतले हाचेर उपाय येवजण चालीक लावपाचे आमी थारयलां. खातें, एनजीओ, पंचायत आनी पालिका एकठांय आयल्यारूच हो प्रस्न सुटावो जातलो, अशें हळर्णकार हांणी सांगलें. जे घरांत सुणी पोसतात ते लोक पांच- स सुणी जल्माक आयली जाल्यार खूब खेपे एक- दोन दवरून उरिल्लीं रस्त्यार सोडटात. घरांतलो गांवठी सुणो जर आमचे कडेन नोंद ना आनी ताणें घरांत पेटे काडल्यांत जाल्यार घरधनयाक दंड दितले. रस्ताद सुण्यांच्या निर्बिजीकरणा खातीर बजेट तरतूद वाडोवपाची गरज ना. हे खातीर निधी आसा, पूण दोन वर्सां जाली हाचो वापर जायना. हे विशीं आमी एनजीओ कडल्यान सुचोवण्यो घेतल्यात, अशें हळर्णकार हांणी सांगले.
अर्थीक तरतूद गरजेंचीः युरी आलेमांव
रस्ताद सुणांच्या विशयांचेर सरकार गंभीर ना. रस्त्याद सुण्यांच्या निर्बिजीकरणा खातीर तीन कोटींची बजेट तरतूद केल्ली, पूण तातूंतले 58 लाखूच मोडल्यात. ते भायर थळाव्यो पंचायती ह्या कामांत मात पसून सहकार्य करिनात अशी कागाळ एनजीओंनी केल्या. निर्बिजीकरणाचो खर्च कोटी रुपया परस चड जाता देखून हे गजालींक अर्थीक तरतूद गरजेंची, अशें बसकेक हजर आशिल्ले विरोधी पक्ष फुडारी युरी आलेमांव हांणी बसके उपरांत सांगलें. तशेंच हे खातीर उत्तर आनी दक्षीण गोंयांत दोन केंद्रां करचे परस दरेका मतदारसंघांत हीं केंद्रां उबारचीं, अशी सुचोवणी तांणी केल्या.
सरकार – धनयां मदीं समन्वय गरजेचोः सरदेसाय
जे लोक गांवठी सुणीं पोसतात आनी तांचें निर्बिजीकरण (कापांव) करिनात. उपरांत पेटे जातकच ते रस्त्यार व्हरून सोडटात, तांचेर सरकारान खर कारवाय करपाक जाय. जे बऱ्या जातीचे सुणे पोसतात तांकां प्रतिज्ञापत्र सादर करप सक्तीचें केलां, पूण धनयांक ह्या अटीं बाबतींत कांय स्पश्टताय ना, देखून सरकार आनी धनी हांचे मदीं समन्वय आसप गरजेचो, अशें फातोड्डेंचे आमदार विजय सरदेसाय हांणी बसके उपरांत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
