भांगरभूंय | प्रतिनिधी
विनायक गांवस: चरावणे मुळाव्या विद्यालयाची इनामां भेटवण कार्यावळ उमेदीन
वाळपय: गांवगिर्या वाठारांतल्या भुरग्यांक बर्यो संदी मेळप गरजेचें. ताका लागून गांवगिर्या वाठारांतल्या भुरग्यां खातीर विवीध कार्यावळी घडोवन हाडून तांकां उर्बा दिवची. गांवगिर्या वाठारांतल्यो शाळो जिव्यो उरपाक जाय. ताका लागून दरेका नागरिकांचें सहकार्य म्हत्वाचें असो उलो चरवणे पंच वांगडी विनायक गांवस हांणी मारलो.
चरावणे मुऴाव्या विद्यालयाच्या वर्सुकी इनामां भेटवण सुवाळ्याक ते उलयताले. ह्या वेळार माचयेर विद्यालयाची प्रभारी मुख्याध्यापिका संजीवनी गांवस, विद्यालयाची शिक्षिका सुवर्णा गांवस, प्रमोद गांवस, रिद्धी गांवस, शिवानी गांवस हाजीर आशिल्लीं.
ह्या वेळार विवीध सर्ती आनी शालेय उपक्रमांचीं हाजीर आशिल्ल्या मानेस्तां हस्तुकीं इनामां भेटयलीं.
विनायका गांवस हांणी चरावणेचे मुळावे शाळेंतली शिक्षिका बरें काम करता. ह्या विद्यालयाचो आंकडो दिसान दीस वाडतूच आसा. ही येवपी काळा खातीर बरी गजाल जावन आसा. गोंयचे पयले मुख्यमंत्री भाऊसायब बांदोडकर हांणी दरेके शाळे वरवीं गांवची उदरगत चालीक लायली. दरेका गांवांत सरकारी मुळाव्यो शाळा सुरू करून गांवच्या लोकांक शिक्षणाच्यो बर्यो सुविधायो उपलब्ध केल्यो. आयज गांवगिर्या वाठारांतल्यो शाळो बंद पडपाक लागल्यात. दरेकल्याक शारांनी वचपाची उमळशीक आसा. अशें जाल्ल्यान येवपी काळांत गांवच्यो शाळा बंद जावपाची शक्यताय न्हयकारूं येना, असो हुस्को तांणी उक्तायलो.
मुख्याध्यापिका संजीवनी गांवस हांणी शाळेचे उदरगती खातीर थळाव्यांचें सहकार्य बरे तरेन मेळटा. ताका लागून अशे तरेच्या उपक्रमां वरवीं भुरग्यांक उर्बा दिवपाचे यत्न सतत करतलीं अशें तिणें म्हणलें.
परंपरीक दिवली पेटोवन कार्यावळ सुरू जाली. माचयेर हाजीर आशिल्ल्या मानेस्तांक फुलांचो तुरो भेटोवन येवकार दिलो. फाटल्या वर्साच्या शिक्षणीक आनी सांस्कृतीक कार्यावळीचो आढावो शिक्षिका सुवर्णा गांवस हांणी घेतलो. ह्या वेळार भुरग्यां वतीन मनरिजवण आनी सांस्कृतीक कार्यावळी सादर केल्यो. पुराय कार्यावळीचें सुत्रसंचालन शिवानी गांवस आनी रिद्दी गांवस हांणी केलें. निमाणें शिक्षक प्रमोद गांवस हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
