भांगरभूंय | प्रतिनिधी
आतां गांवांगांवांनी आनी दरेक वाड्यार नळ आयिल्ल्यान ‘बांय’ ही गजाल इल्ली-इल्ली फाटीं पडत चल्ल्या.
आदल्या तेपार घरांत ना जाल्यार भोंवतणी बांय आसप म्हणल्यार गिरेस्तकाय समजताले.
आमच्या घराच्या आंगणा कुशीक बांय आसा. वाड्या वेलीं बायलां उदका खातीर बांयचेर गर्दी करतालीं, आनी दादले सांजवेळार न्हावपाक येतना, दिसभराच्यो एकामेकांक गजाली सांगून बांय हालोवन उडयताले.
बांय हो एक असो जागो, त्या जाग्यार गांवांतल्यो सगल्यो BREAKING NEWS मेळटात. बायलां उदक काडपाक येतात तेन्ना, गजालींक सामको नेट येता आनी काळा-वेळाचें भान दवरिनासतना बांयचे साक्षीन आपले मन मेकळे करून उडयतात.
मांय-सुनेचें घरांत पेटलें जाल्यार सून टणा-टणा करीत डायरेक्ट बांयचेर पावता आनी आपली बाजू हेरां कडेन मांडटा. आपली मांय कशी कर्म दळिद्री आनी ती आपणाक कशी त्रास करता, हें ती टणटणत बाकीच्या बायलांक सांगता. थोडीं बायलां थंडसाणीन तिचें आयकून घेतात जाल्यार थोडीं जाणां झगडीं वाडपा खातीर तातूंत पेत्रोल रकयतात.
कोणाक कितल्यावो म्हयनो लागला, कोण कोणा वांगडा पळून गेलें, भाटकाराचे नाल्ल आयज कोणे चोरले, कोणाचे चली ना जाल्यार चलो कितले फावटी नापास जालाे, शेवत्याली गाय काय म्हस चड दूद दिता? माणार आयज धालो खेळपाक कोण येतलीं, गणपती कोणा-कोणागेर कितले दिसांचो दवरला, मटक्याचो नंबर कितलो आयलो आनी कोणाक कितले पयशे लागले आनी गडगड्यांत कोण बुडलो. ह्या सगल्या विशयांचेर, बांयचेर बायलांचें समुद्र-मंथन जाता.
पूण इतले मात खरें! ह्या बांयच्या थंडगार उदकान न्हायत जाल्यार खंयचेंच दुयेंस तुमकां जायना आनी तुमची पिराय वाडटा असे आमचे 80-90 वर्सा जगिल्ले जाणटेले सांगताले. गाडयेक राजू घालून कळशेन उदक काडप, हो बर्यांतलो बरो व्यायाम असो तांचो अणभव सांगतालो. ह्या व्यायामान खांदेदुखी, मानेची दूख, हाताक मुयो येवप, Frozen Shoulders हे सारकीं दुयेंसां पयसावतात. बांयचे गोडे उदक कितलेय पिल्यार थंडी जायना आनी ल्हान भुरग्यांक दुयेंस जायना अशें म्हणटात. दिसभर शेतां, भाटांत, कुळगरांत आंग मोडसर काम करप आनी मागीर बांयचेर येवन घसघशीत उदक न्हावप हाचे सारकें सर्गसूख दुसरें ना.
बांयचें न्हाल्ले उदक ना जाल्यार आयदनां, कपडे उमळिल्ले उदक वचपाक एक चर वा खळी केल्ली आसता. ज्या जाग्यार ह्या व्हांवत्या उदकाची चर सोंपता, ताचे सरभोंवतणी निरपणस वा केळीचीं झाडां लायिल्लीं आसतात. तांका 24 वरां उदक मेळिल्ल्यान निरपणस वा केळींच्या झाडांक घसघशीत फळां धरतात आनी तांची वाडूय निरोगी जाता. थोडे कडेन वायंगी, विरवेल, घोसाळीं, भेंडे हाचीय लागवड करतात. अशे केल्ल्यान घरांत खावपाक भाजी लागता, ती ताजी आनी रसरशीत मेळटा आनी तांचेर वखदां ( chemicals ) मारिल्लीं नासतात.
जशें जशें उदरगतीचें वारें व्हांवूंक लागलें आनी गांवांगांवांनी नळ पावले. ताका लागून खूब जाणांनी आपल्यो बांयो पुरयल्यो. झरे, तळयो, बांद हांची जतनाय घेवंक ना. आतां लोकवस्ती वाडिल्ल्यान उदकाची पुरवण कमी पडपाक लागल्या. जांणी आपल्यो बांयो सांबाळून दवरल्यात, ते सालवार जाले. गाेंयांत तर आत्र्या पयऱ्यान नळ वचत आसता. लोकांक टॅंकराच्या उदकाचो वापर करचो पडटा. बांयो पुरयिल्ल्यान हो फटको तांकां बसूंक लागला. पूण जांणी आपली बांय सांबाळून दवरल्या ते वाटावल्यात. तांकां नळ गेलो कितें आनी आसलो कितें कसलोच फरक पडना.
आतां बांयच्या उदकाचो जागो नळाच्या उदकान घेतला. जशो जशो नव्यो सोयी येत आसात तसो तसो मनीस इल्लो इल्लो आळशी आनी दुयेंत जायत चल्ला. हें मनशाक खूब घातक जालां. बांयचेर उदक काडप म्हणल्यार एक तरेचो व्यायामूच. भरिल्ली कळशी बांयतल्यान वयर काडटना हाताक, कमराक आपसूक
व्यायाम जाता.
आदल्या तेपार, मिक्सर, वाॅशींग मशीन, नळ अशें कांयच नाशिल्ले. रगड्यार वांटप जातालें. हातान कपडे उमळप जातालें. नळ नाशिल्ल्यान बांयचें उदक काडप जातालें. हें सगलें करता आसतना दीसपट्टो तांकां एक तरेचो व्यायाम जातालो ते खातीर आदलीं बायलां घटमूट आशिल्लीं. आतां हें सगलें इतिहास जमा जालां. फुडारांत आनीक कसलीं माक्नां येत सांगू नजो. पूण जो आदल्या तेंपार घरांतलीं कामां करता आसतना बायलांक व्यायाम जातालो तो मात आतां जावप अशक्य अशेंच म्हणचें पडटलें.
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
