भांगरभूंय | प्रतिनिधी
प्रवीण आर्लेकार: हंसापूर उबारपी रंगमाचयेच्या कामाचो शुभारंभ
पेडणें : गांवची उदरगत थळाव्यांच्या एकवटाचेर निंबून आसता. एकठांय येवन काम केल्यार, खंयच्याय कामाक वेग येता. तशेंच चांदेल हंसापूर पंचायत वाठारांतल्या श्री सांतेरी मंदीर वाठारांत रंगमाची उभारल्या उपरांत ताचो खर्या अर्थान कलाकारांक लाव मेळटलो. नवे कलाकार घडटले. अश्या कलाकारांक गांवांगांवांत रंगमाचये वांगडा रवींद्र भवन उबारपाक आपूण यत्न करतां, अशें पेडणें मतदार संघाचे आमदार प्रवीण आर्लेकार हांणी सांगलें.
हंसापूर हांगच्या श्री सांतेरी मंदीर वाठारांत उबारपी रंगमाचयेच्या कामाचो शुभारंभ केल्या उपरांत आमदार उलयताले. ह्या वेळार सरपंच तुळशीदास गांवस, उपसरपंच रुची मळीक, देवस्थान पदाधिकारी, नागरीक हाजीर आशिल्ले.
गोंय भांगरा महोत्सवा निमतान सरकारा वरवीं पंचायतीक एक कोटी रुपया उदरगतीच्या कामा खातीर निधी म्हणून दिलां. ते निधींतल्यान हंसापूर हांगच्या श्री सांतेरी मंदीर वाठारांत वट्ट 19 लाख रुपया खर्च करून रंगमाची उबारपाच्याक कामाचो शुभारंभ हालींच आमदार प्रवीण आर्लेकार, सरपंच तुळशीदास गांवस हांचे हाजेरींत जालो.
आमदार प्रवीण आर्लेकार हांणी फुडें सांगलें, उदरगत नदरे मुखार दवरून सगळे मेळून काम करुया. जे राजकीय मतभेद आसात ते पयस करून आपल्या प्रभागाची, पंचायत वाठाराची म्हळ्यार आपल्या मतदार संघाची उदरगत करपा खातीर सगळ्यांनी एकठांय येवन लोकांच्या हिता खातीर काम करुया, अशें तांणी सांगलें.
ह्यान पयलीं ह्या पंचायत वाठाराची अपेक्षीत अशी उदरगत जावंक ना. ती उदरगत आपूण फुडाकार घेवन करतलों. पंचायतीक आपलें सदांच फाटबळ आसतलें. जीं कामां आसात ताची सुचवणी नागरिकांनी, सरपंचांनी आनी पंचायत मंडळांनी करची, असो उलो आमदार आर्लेकार हांणी दिलो.
हंसापूर सरपंच तुळशीदास गांवस हांणी, गांवची उदरगत करतना थळावे आमदार प्रवीण आर्लेकार हांचें सहकार्य बरे तरेन मेळिल्ल्यान उदरगतीच्या कामांक नेट आयला. आमी सगळे एकठांय येवन कामां करून घेवया. आमी उदरगतीच्या कामांक खंयच आडखळ हाडपाचो यत्न करचो न्हय. आमी जर आमदाराक उदरगतीच्या कामां खातीर साथ दित जाल्यार तेय नेटान कामां करतले, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
