भांगरभूंय | प्रतिनिधी
श्रीपाद नायकः मोरजे अन्न महोत्सवाचें उक्तावण, खाद्य संस्कृती वांगडाच लोक संस्कृतीक उर्बा
भांगरभूंय । प्रतिनिधी
पेडणें: अन्न महोत्सवा सारकिल्ल्या सांस्कृतीक कार्यावळींचें आयोजन शारां बदला गांवगिऱ्या वाठारांतूच आयोजीत करचे. शारांतले परस ते गांवगिऱ्या वाठारांत अदीक सोयीचे जातले. तातूंतल्यान पर्यटन वाडीक लागपाक शकतले. ते खातीर सरकारान अशे तरेचे पर्यटन महोत्सव गांवगिऱ्या वाठारांतूच आयोजीत करपाचेर भर दिवचो, अशें केंद्रीय मंत्री श्रीपाद नायक हांणी सांगलें.
मोरजे आयोजीत केल्ल्या अन्न महोत्सवाचें उक्तावण केले उपरांत मंत्री नायक मुखेल सोयरे म्हूण उलयताले. पर्यटन खात्यान पयलेच खेपे अन्न महोत्सव शार वाठारांतल्यान गांवगिऱ्या वाठारांत तोवूय मोरजी सारक्या गांवांत पयलेच खेपे आयोजीत केल्लो. ह्या महोत्सवाच्या उक्तावण सुवाळ्याक माचयेर मंत्री नायक हांचे वांगडा पर्यटन विकास म्हामंडळाचे संचालक थळावे आमदार जीत आरोलकार, मोरजी जिल्हो पंचायत वांगडी सतीश शेटगांवकार हाजीर आशिल्ले.
केंद्रीय मंत्री नायक हांचे हस्तुकीं दिवली पेटोवन अन्न महोत्सवाचें उक्तावण जालें. तशेंच मळबांत बोमाडे सोडून कार्यावळीक सुरवात केली.
केंद्र सरकार आनी राज्य सरकार पर्यटनाक चालना दिता. अशें महोत्सव हे फुडें लेगीत गांवगिऱ्या वाठारांत आनी पर्यायान मांद्रें मतदारसंघांत दर्यादेग वाठारांत करचे अशें थळावे आमदार जीत आरोलकार हांकां मंत्रीर नायक हांणी सुचयलें. आपलो सदांच तांकां आदार आनी तेंको आसतलो, अशेंय तांणी स्पश्ट केलें.
ह्या महोत्सवांतल्यान खाद्यपदार्थां वांगडाच गोंयची संस्कृती आनी परंपरीक वेवसाय करून खाणां करतात, तांचें प्रदर्शन आनी विक्री ह्या माध्यमांतल्यान जाता. शारांत हे आदीं अन्न महोत्सव आयोजीत जाताले, पूण सरकारान दूरदिश्टी दवरून अन्न महोत्सवा सारकिल्ल्या कार्यावळींतल्यान जर पर्यटनाक आनी थळाव्या वेवसायिकांक, कलाकारांक संद मेळटा जाल्यार ते गांवगिऱ्या वाठारांत आयोजीत करपाचो निर्णय घेतला. देशी- विदेशी पर्यटक अशा महोत्सवांतल्यान गोंयचे खाद्य संस्कृती वांगडाच गोंयची कला आनी संस्कृतीचो अणभव घेतात, अशें मंत्री नायक हांणी सांगलें.
अन्न महोत्सव आयोजीत करपा खातीर आपल्या मांद्रें मतदारसंघाक संद दिल्ले खातीर आमदार जीत आरोलकार हांणी मुख्यमंत्री डॉ. प्रमोद सावंत आनी पर्यटन मंत्री रोहन खंवटे हांचे उपकार मानले. अशा महोत्सवाचें आयोजन करपाक खर कश्ट लागतात, पूण तेच वांगडा सांस्कृतीक कार्यावळी वांगडाच गोंयची लोकसंस्कृती आनी खाद्य संस्कृतीचो पर्यटकांक आस्वाद घेवपाक मेळटा, हाची खोस जाता. अशा महोत्सवा निमतान पर्यटक गांवांत येतात. ताका लागून गांवांतलीं रॅस्टोरंण्ट, ल्हान- व्हड हॉटेलां, खोपी वा रेस्ट हावस हांकां ल्हान- व्हड वेवसाय मेळपाक शकता, अशें आमदार आरोलकार हांणी सांगलें.
हया अन्न महोत्सवांत सांस्कृतीक कार्यावळींची रास आशिल्ली. तातूंत भारतीय कला वांगडाच गोंयचे लोकनाच आनी हेर सांस्कृतीक कार्यावळी सादर जाल्यो. तातूंत फुगडी, दिवली नाच, मांडो सादर जाले.
महोत्सवांत थळाव्या वेवसायिकां वांगडाच गोंयच्या वेवसायिकांनी वेगवेगळ्या खाद्य पदार्थांचें तशेंच पेयांची दुकानां घातल्यांत. ह्या महोत्सवांत सात दीस थळाव्या आनी गोंयच्या वेवसायिकांक वेवसाय मेळटलो.
आपूण जीं खाणां करतात तें ह्या महोत्सवांत मांडचे अशें आपल्याक आमदार जीत आरोलकार हांणी सांगलें. तांणी स्वता आपल्याक दुकान घालपाक मजत केल्या. आपूण सदांच ताच्या उपकारांत रावतलीं, अशें एके थळावे ज्येश्ठ नागरीक बायलेन सांगलें.
ह्या महोत्सवांत शेवयो, उकडें शीत, लाडू, नेवऱ्यो, फेणयेंत भाजिल्लें नुस्तें विकपाक दवरलां. ह्या महोत्सवा विशीं मोपाचे सरपंच सुबोध महाले, शिक्षक गावडे, वकील सिद्धी आरोलकार, पेडणेंचे नगराध्यक्ष माधव सिनाय देसाय, प्रसन्नकुमार शेटगांवकार, महेश परब हांचे सयत साबार थळाव्या लोकांनी समाधानकारक प्रतिक्रिया उक्तायल्यो. उक्तावणाच्या दिसा पेडणें पुलीस निरिक्षक दत्ताराम रावत हांच्या मार्गदर्शना खाला खर पुलीस बंदोबस्त दवरिल्लो. येरादारी पुलिसांनीय आपली जापसालदारकी योग्य तरेन हाताळ्ळी.
गांवांत प्रदर्शन मांडपाची खोसः सोनाली शेटगांवकार
आमी नाल्ला पासून हस्तकलेचे वेगवेगळ्या तरांचे कलाविश्कार सादर करतात. नाल्ला पासून वेगवेगळ्यो वस्तू तयार करतात. ताचें प्रदर्शन मांडपाचें आपल्याक आपल्या गांवांत मोरजेंत संद मेळ्ळी. आमदार जीत आरोलकार हांच्या आदाराक लागून हें शक्य जालें, अशें कोको आर्टची धनीण सोनाली शेटगांवकार हांणी प्रतिनिधी कडेन प्रतिक्रिया दितना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
