भांगरभूंय | प्रतिनिधी
भांगरभूंय । खेळां मेज
पणजीः राज्यांतल्या तरणाट्यांच्या खेळां गुणांत वाड जावची म्हणून जाय त्यो सुविधा मेळोवन दिवपाचें सरकार यत्न् करता. मडकय मतदारसंघांत सुविधा तयार करपा खातीर आपूण वावुरतां. तरणाट्यांक तांकां जाय ते खेळ खेळपाक मेळचे हे खातीर यत्न चल्ल्यात. गांवगिऱ्या वाठारांतल्या क्रिकेट खेळगड्यांनी स्वताच्या नाड्यार नांव मेळोवपाचें काम केलां अशें वीज मंत्री सुदिन ढवळीकार हाणे सांगलें.
कुंडय क्रिकेटर्स क्लब, आनी क्बल हावसाच्या रुप्या महोत्सवी दिसा निमतान आयोजीत केल्ले कार्यावळींत ते उलयताले. तांचे हस्तुकीं संजय कामत आनी संतोष एम नायक हांका जिणेगौरव पुरस्कार तशेंच खेळां मळार चड करून क्रिकेट मळार खाशेलो वावर केल्ल्या खेळगड्यांचो भोवमान केल्या उपरांत ते उलयताले. माचयेर कुंडयचो सरपंच सर्वेश जल्मी, उद्देजक सुभाष महानंदू नायक, रणजी क्रिकेट खेळगडो अवधूत आमोणकार, रोबीन डिसोझा, गणेशोत्सव मंडळाचो अध्यक्ष नागेश फडते,कुंडय क्लबाचो अध्यक्ष प्रमोद फडते आशिल्ले.
खेळाक लागून लोकां मदीं एक वेगळेंच नातें तयार जाता. शाराचें तुळेंत गांवगिऱ्या वाठारांत खेळाच्यो मुळाव्यो सुविधा कमी आसतात. मात आतां परिस्थिती बदल्ल्या. सरकारा वतीन गांवगिऱ्या वाठारांत खेळा सुविधा तयार केल्यात आनी तरणाटे तांचो उपेग करपाक लागल्यात. 2002 उपरांत खेळा मळार बदल घडत गेले. खेळाक चालना दिवपा खातीर आपणे 1984 वर्सा आठ खेळां क्लब सुरू केले अशें ढवळीकारन सांगलें.
डॉ घनःशाम म्हार्दोळकारान गांवचे सामाजीक उदरगती खातीर एकठांय येवून काम केल्ले खातीर कुंडयच्या लोकांची तुस्त केली. संतोष नायक हाणे तरणाट्यांक खेळा मळार करिअर करपा खातीर फावो तें मार्गदर्शन करपाची गरज उक्तायली. विरेश कामत हाणे येवकार दिलो आनी सचीन सुर्लकार हाणे सूत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
