भांगरभूंय | प्रतिनिधी
भांगरभूंय । प्रतिनिधी
पर्वरीः देशीची उदरगत करपा खातीर ग्राम स्वराज्याच्या होच एक पर्याय आसा अशें महात्मा गांधी हांणी सांगल्लें. लोक प्रतिनिधींनी तें मतींत दवोरून आपल्या मतदारसंघांतल्या गांवगिऱ्या वाठाराची उदरगत करपा कडेन चड लक्ष दिवपाक जाय. पेन्ह द फ्रान्स पंचायत वाठारांत विधिमंडळ, कार्यकारी मंडळ आनी न्यायपालिका ह्या सरकाराच्या तीन खांब्यांची मुख्यालयां आसात. पर्वरी मतदारसंघांतल्या लोकां खातीर ही अभिमानाची गजाल आसा, अशें राज्यापला पी एस श्रीधरन पिल्लय हांणी सांगलां. सुकूर, साल्वादोर द मूंद आनी पेन्ह द फ्रान्स पंचायत मंडळांच्या लोक प्रतिनिधी कडेन ते उलयताले. पर्वरीचो आमदार आनी पर्यटन मंत्री रोहन खवंटे ह्या वेळार हाजीर आशिल्ले.
सुकूर हांगा आयोजीत केल्ले कार्यावळींत राज्यपालान पर्वरी मतदारसंघांतल्या डायलॅसिस दुयेंतीक अर्थीक मजतीचें वांटप केलें. डायलॅसिस दुयेंती जावप ही सामकी वेदनादायक गजाल आसली तरी तांणी मन शांत दवोरून येता ते परिस्थितीक तोंड दिवपाची तयारी दवोरपाक जाय अशें तांणी सांगलें. फाटल्या 18 म्हयन्यां सावन आपूण गोंयांत फिरतां. हांगची देवळां आनी चर्ची हांचें बांदकाम वैशिश्ट्यपूर्ण आसा. गोंयांतलो सैम आनी हेर अणभवांचेर आपूण पुस्तक बरयतोलों. तें वाचतल्याक गोंयांक भेट दिवपाची उमळशीक लागतली असो हावेस तांणी उक्तायलो.
पर्वरी वाठारांत चडशी सरकारी खात्यांचें स्थलांतरण जालां. आनीकूय सरकारी कार्यालयां पर्वरे हाडपाचें काम चल्लां अशी म्हायती रोहन खवंटे हांणी ह्या वेळार दिली. सरकारी कार्यालयां येतलीं ही सामकी बरी गजाल मात ताका लागून मतदारसंघांतल्या साधन सुविधांचेर तांचो ताण पडटलो अशी भिरांत तांणी उक्तायली. ते खातीर अतिरिक्त साधन सुविधा तयार करपाची गरज तांणी उक्तायली. राज्यपाल सहजा खेंड्यांक भेट दिनात. मात श्रीधरन पिल्लय हांणी तो पायंडो मोडला. गांवगिऱ्या वाठारांत वचून थंयच्या लोकांचे प्रश्न ते समजून घेतात ही गोंयचे नदरेन बरी गजाल आसा अशें तांणी सांगलें.
राज्यपालान पेन्ह द फ्रान्स चर्च आनी बेताळ महारूद्र देवळाक भेट दिली. तांच्या वांगडा रोहन खवंटे, बार्देशाचो मामलेदार दशरथ गांवस आनी मिहीर वर्धन आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
