भांगरभूंय | प्रतिनिधी
देवानंद नायक : उपेंद्र गांवकार हांकां समितींतल्यान काडला
भांगरभूंय । प्रतिनिधी
पणजी : उपेंद्र गांवकार हांकां आमी गोमंतक भंडारी समाजाचे समितींतल्यान काडून उडयला. ते खातीर तांणी स्थापन केल्ली समिती ही बेकायदो आसा. जर आमच्या समाजाचो रजिट्रेशन नंबर वापरून उपेंद्र हांणी समितीचें जात प्रमाणापत्रां दिलीं जाल्यार आमी ताचेर आक्षेप घेतले. हें प्रमाणपत्र मेळोवपी लोकांक नोकरी तशेंच शिक्षणाक त्रास जातले, अशी शिटकावणी गोमंतक भंडारी समाजाचे अध्यक्ष देवानंद नायक हांणी दिली.
भंडारी समाजांत उबी फूट पडून उपेंद्र गांवकर हांणी गोमंतक भंडारी समाज केंद्रीय कार्यकारणी ही वेगळी समिती जाहीर केल्ली. हाचेर प्रतिक्रिया दिवपा खातीर गोमंतक भंडारी समाजान पत्रकार परिशद आपयल्ली. ह्या वेळार देवानंद नायक उलयताले.
2018 त उपेंद्र गावंकार हांणी वांगडी नोंदणी आनी वेंचणूक खर्चांत गुड्डुलासांव केल्ल्यान समाजान गांवकार हांकां काडून उडयला. ते खातीर जी समिती तांणी स्थापन केल्या ती बेकायदो आसा, असो आरोप नायक हांणी केलो.
समाजाची समिती स्थापन जावन 112 वर्सां जालीं. त्या वेळार जी घटना तयार जाल्ली तिका अनुसरून आमी फुडें वतात. गांवकार जेन्ना सरचिटणीस आसले तेन्ना तांणी 638 नांवां समितींत घातिल्ली. तांचे कडल्यान 3.30 लाख रुपया वांगडी शुल्क तांणी भरूंक ना. तशेंच वेंचणूक काळांत समितीच्या 9 लाख रुपयांचो वापर तांणी केलो आनी ताचो हिशोब तांणी दाखोवंक ना. ताका लागून घटने प्रमाण तांकां समितींतल्यान भायलो रस्तो दाखयलो, अशें नायक हांणी सांगलें.
आमची समिती ही वेंचून आयल्ली समिती. हे समितीक जिल्हो निबंधकान मान्यताय दिल्या. हाचेर गांवकार हांणी आक्षेप घेतिल्लो, पूण निबंधकान तो भायर मारलो. ताका लागून जात प्रमाणपत्र दितले जाल्यार सध्याचे समितीचे अध्यक्ष आनी सरचिटणासाची सय जाय पडटा. जर गांवकार हांचे समितीन आमचे समितीचो रजिस्ट्रेशन नंबर वापरून जात प्रमाणपत्र दिलें जाल्यार आमी ताचेर आक्षेप घेतले, अशी शिटकांवणी नायक हांणी दिली.
गांवकार हे सरचिटणीस आसतना जातीय जनगणना करची अशें सांगताले, पूण त्या वेळार कोण तयार जावंक ना. आमी साबार बसका घेवन जातीय जनगणना करपाचो थाराव घेतले आनी तो थाराव सरकारा कडेन धाडटले. कायद्या प्रमाण ही प्रक्रिया आमी चालीक लायतले. तशेंच आरक्षण कितलें दिवप हें सरकाराचेर निंबून आसतलें, अशें नायक हांणी म्हणलें.
2011 त जनगणना जाल्ली. ताची अंमलबजावणी करपा खातीर गांवकार हांकां किते जातालें? खाजगी रितीन जातीय गणना करप चुकीचें, सरकार हे गणनेक मान्यताय दिवचें ना. हे खातीर गांवकार हांणी समाजाच्या दोळ्यांक उदक लावपाचें बंद करचें. ही जनगणना करपा खातीर 19 ओबीसीच्यो जाती आसात, ते संबंदांत सरकाराक निवेदन दितले. समाजाचो फुडार पेड्डेर करपाचें हें कारस्थान आसा, अशें आदले अध्यक्ष अशोक नायक हांणी सांगलें. भंडारी समाजाचे वेंचणुकेंत 59 जाणांनी अर्ज केल्ले आनी 17 जाण वेंचून आयल्यात. दर म्हालांनी आमची समिती आसा. येता त्या दिसांनी महिला आनी युवा समितीची निवड जातली, अशें नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
