भांगरभूंय | प्रतिनिधी
‘स्वातंत्र्यवीर सावरकर’ चित्रपटाचेर उलयतना रणदीप हुडा हांची प्रतिक्रिया
भांगरभूंय । प्रतिनिधी
पणजीः देशाच्या स्वांतत्र्याक हजारांनी स्वातंत्र्य सैनिकांनी योगदान दिलां, पूण तातूंतले चार जाण फक्त पॉस्टर बॉय जावन उरल्यात. हो तांचेर व्हड अन्याय आसा. जे अहिंसावादी आशिल्ले तांकां महलांत बंद करून बोकडेच्या दुदाची आयस्क्रीम खावयतले आनी जे शस्त्रधारी आशिल्ले तांकां काला पानी धाडटाले. अहिंसेक लागून तडजोड जाली म्हूण न्हय जाल्यार शस्त्र क्रांतीक लागून देश स्वतंत्र जाला, अशें मत बॉलिवूड अभिनेते रणदीप हुडा हांणी विनायक सावरकर हांचे जिणेचेर उलयतना मांडलें.
रणदीप हुडा हांणी अभिनय आनी दिग्दर्शीत केल्लो स्वातंत्र्यवीर सावरकर चित्रपट भारतीय पॅरोनेमा ओपनींग फिल्म म्हूण बिरेस्तार सकाळीं प्रदर्शीत जालो. उपरांत आपले विचार मांडपा खातीर रणदीप हुडा सयत हेर कलाकार अंजली हुडा, जय पटेल, अमीत सियाल आनी मृणाल दत्ता हांणी पत्रकार परिशद घेतली.
चित्रपटा विशीं उलयतना हुडा हांणी सांगलें, आमकां स्वातंत्र्य फक्त तीन- चार जाणांनी दिवंक ना. ते खातीर हजारांनी लोक वावुरले, पूण हे तीन- चार लोक पोस्टर बॉय जावन उरले. हांव उरिल्ल्या हजारांनी स्वातंत्र्य सेनिकांचेर हो अन्याय मानता. सगळ्यांक न्याय हो मेळपाक जाय आनी ते भायर भारताच्या इतिहासांत आनी स्वातंत्र झुजांत सुवात मेळपाक जाय.
अंदमान जुंव्यार काला पानी बंदखणींत सावरकर हांचो सामकोच छळ जातालो. एक पेलो उदक तांकां दिवन कितलेशेंच लिटर घाण्याचेर तेल काडपाक लायतले. वेगवेगळे तरेन तांची सतावणूक जाताली. देखून बंदखणींत आपलें आयुश्य काबार करचे परस देशा खातीर योगदान दिवपाक तांणी स्वता खातीर आनी हेर कैद्यां खातीर ब्रिटीशांक पत्र बरयलें, अशें हुडा हांणी सांगलें.
तांचे मुक्ती खातीर सावरकर हांणी जामीन याचिक बरोवपाक सुरवात केली आनी हे याचिकेक आतां माफीनामा म्हूण हिणयतात. महात्मा गांधीजी, जवाहरलाल नेहरू हांणी जामीन याचिका बरयल्ली आसा आनी तांची प्रत म्हजे कडेन आसा. तिनूय याचिका पळयल्यार सगळ्यांची भास एकूच आसा. पूण गांधी आनी नेहरू हांणी बरयल्ली याचिका दाखोवन म्हाका वाद करपाचो ना, असो दावो हुडा हांणी केलो.
बंदखणींत जिवीतभर तशेंच पडून जीव दिवपाचे वाटेर आसले, पूण सावरकर हांणी सगळे यत्न कसाक लावन भायर सरपाचो निश्चेव केल्लो. तांणी खूबश्या कैद्यांची जामीन याचिका बरयली आनी ब्रिटीशांनी तांकां मुक्त लेगीत केले. ते भायर सावरकर हांणी बरयल्लें, जर म्हज्या नांवा खातीर ह्या नरकांतल्यान ह्या कैद्यांचेर दया करपाक तुमका अडचणी येता आसत जाल्यार म्हजें नांव वेगळे करचें. पूण त्यो गजाली लोकां मुखार हाडिनात आनी तांचेर राजकी खत लायतात, अशें हुडा हांणी म्हणलें. गांधीजी आगा खान पॅलेसींत बंदखणींत आशिल्ले, नेहरू दुसरे सुवातेंत बंदखणींत आसले. तांकां सगळ्यो सोयी सुविधा आसल्यो. तातूंत रांदपी आसलो आनी तांकां बोकडेच्या दुदाची आयस्क्रीम लेगीत मेळटाली. शस्त्र क्रांतीचे लोकांक चड खतरनाक मानताले आनी अंहिसावाले आसले तांकां खतरनाक मानचे सोडून तांचे वांगडा तडजोड करताले. उपरांत शस्त्र क्रांतीच्या लोकांक ख्यास्त दिवपा खातीर काला पानी, मांडले वा येमन धाडटाले, असो इतिहास हुडा हांणी सांगलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
