गांधीजीचीं तत्वां आनी आयचे तरणाटे

भांगरभूंय | प्रतिनिधी

आमच्या शाळां आनी म्हाविद्यालयांनी आमच्या तरणाट्यांक गांधीजींच्या तत्वां विशीं म्हायती दिवपाक पोटतिडकेन प्रयत्न करचे पडटले. नातर आमच्या तरणाट्यांक गांधीजी आनी ताच्या तत्वांचें म्हत्वूच कळचेंना.

सर बॅन किंग्सले हॉलीवूडाचोवरिश्ट कलाकार. इफ्फी 2009 महोत्साक हाजीर जावचे खातीर गोंयांत आयिल्लो. सर बॅन किंग्सले भारतीयांक एक म्हवाचो कलाकार, कित्याक? ‘गांधी’ ह्या इंग्लेज भाशेंतल्या फिल्मांत महात्मा गांधीजींची भुमिका करून ताणें गांधीजीचो संदेस अख्या संवसाराक पावयलो म्हणल्यार फट जावचें ना. तो गोंयांत आयलां. तें नीब घेवन एका गोंयच्या टिव्ही चॅनेलान एक कार्यक्रम घडोवन हाडलो. जायत्या तरणाट्यांक तशेंच जाणट्यांक एक प्रस्न केलो. “Is Gandhism relevant in the present day scenario?’’ हो प्रस्नो असो आसलो. म्हणल्यार गांधीच दुख्ख जालें जाल्यार दुस-या अर्दान काळजाक व्हड धोको बसलो.
नेणारपण
त्या प्रस्नाचे जबाब आयकून आमचे आयचे तरणाटे सारके घुस्पागोंदळाक सांपडलेल्या परीं दिसले. खरेपणीं आमचे तरणाटे गांधीजी विशीं सारके नेणार आसात म्हूण स्पश्ट जालें. गांधीजीचे शिकवणेची आमच्या भुरग्यांक मातूय जाणविकाय ना म्हूण सिद्ध जालें. हाकाच लागून तांणी जबाब दितना अशे जबाब दिले, गांधीजीची शिकवण ओल्ड फॅशन, आदल्या काळा वेल्या गांधीजीचीं तत्वां आयच्या काळाक मातूय उपकारनात. गांधीजीची शिकवण फकत फिल्मांनी उपकारता. ख-या जिवितान न्हय. जेन्ना आयचो शिक्षित म्हणिल्लो तरणाटो जर असो उलयता जाल्यार तो आमच्या देसाचो बापूय महात्मा गांधी हाचे विशीं कांयच नकळं म्हणपाक हांव फाटीं सरना. पूण त्याच बराबर भोव थोडे– हाताच्या बोटांनी मेजपा इतले तरणाटे आसले. जांणी आपली जाप बेस बरी दिली. गांधाजी म्हणल्यार कितें? तांकां सारकें खबर आसलें म्हण कळून आयलें.
गांधीजीचीं तत्वां
त्या खातीर हांव गांधीजीचीं कांय तत्वां आमच्या तरणाट्यांच्या दोळ्यां सामकार दवरतां… गांधीजीचे तीन माकड आमच्या तरणाट्यांनी पळयल्यात आसतले. तांणी आपलें तोंड, कान आनी दोळे धांपल्यात. हे माकड आमकां वायट उलय नाकात, वायट पळय नाकात आनी वायट आयक नाकात म्हूण संदेस दितात. हे विचार ऑल्ड फॅशनड् आसा काय?
सत गांधीजीच्या जिविताचो एक म्हत्वाचो भाग जावन गेलो. सता विशीं गांधीजीन म्हणलां, – ‘Truth is just like a vast tree which yields more and more fruits the more you nature it.’ म्हणल्यार, “ सत एक व्हड रुख जावन आसा. जाचो जितलो चड परामर्स करता. तितलो तो चड फळां दिता.” सता वरवीं जिवीत फुडें व्हरप आयच्या समाजांत उपकारना काय ?
गांधीजी नितीचो भक्त आसलो. गरीब- गिरेस्त, ल्हाव वा व्हड, आदीं सगळ्यांक एकसारकेंपणीं नीत मेळची म्हण तो जिवीतभर वावुरलो. नीत दुडवांच्या आदारान विकती घेवंक फावना. हें ताचें स्पश्ट मत आशिल्लें. गरिबांतल्या गरीबाक एकसारकेंपणीं नीत मेळची हो ताचो आवंडो आशिल्लो. हे विचार फकत फिल्मांनी आसपाचे आनी आमच्या ख-या जिवितान आसपाचे न्हय काय?
स्वतंत्रायेचो तो एक व्हड फुडारी जावन गेलो. ताका आमचो भारत देस खरेंपणीं स्वतंत्र जाल्लो जाय आशिल्लो. स्वतंत्रताये विशीं ताचो विचार असो आशिल्लो. ‘ स्वतंत्रताय म्हणचें आपखोशयेन शिस्त सांबळप आनी देसाच्या कायद्याचें आपखोशयेन पालन करप. ’ आमकां ताणेंच स्वतंत्रताय मेळोवन दिली आमी शिस्त पाळिनासतना आनी कायद्याचो भाग करून स्वतंत्रतायेचो नास करून सोडला. हो महात्माचो विचार आयच्या समाजाक उपकारना काय?
गांधीजीचो हुस्को
इतलेंच न्हय, गांधीजीन ज्यो वायट घडणुको आमच्या समाजान घडटात, ताचे विशीं वेगळी उणीं शंभर वर्सां फाटीं सुचना दिल्लीं. ह्या वायट घडणुको नास करूंक उपाय सांगिल्ले. शिक्षणा विशीं ताचें मत म्हणल्यार भारताच्या प्रत्येक नागरीकांक, गरीब जावं गिरेस्त जावं, शारांतलो जांव वा खेड्यांतलो जावं. एक सारकें उंच दर्ज्याचें शिक्षण मेळूंक जाय. प्रत्येक मनशान आपलो सबाव समाजाचे कायदे मनांत दवरून फुलोवपाक जाय. आमच्या काळजांनी देसभक्तीची कीट पेटोवंक जाय, पंचायती राज जावपाक जाय, आमच्या अस्तुऱ्यांक दादल्या परीं एकसारको कसलोच भेदभाव नासतना, रेस्पेरीत आनी मान मेळपाक जाय. अनटॅचेब्लीटी जी भारतांत आसा ती नास जावंक जाय. लोकशाये वरवीं खरेपणीं लोकांच्या हिताचो सरकार घडपाक जाय, आदीं गांधीजीचे हे शंभर वर्सीं फाटले विचार आयच्या समाजाक लागून जायना काय?
सोंपयतना…
आमच्या तरणाट्यांनी गांधीजीचीं तत्वां ऑल्ड फॅशन आनी आयच्या समाजांत उपकारना म्हणप हें आमचें दुर्दैव जावन आसा. आमच्या वडलांनी आनी अदीक करून आमच्या शाळां आनी म्हाविद्यालयांनी आमच्या तरणाट्यां गांधीजीच्या तत्वां विशीं म्हायती दिवपाक पोटतिडकेन प्रयत्न करचेच पडटले नातर आमच्या तरणाट्यांक गांधीजीचीं आनी तांच्या तत्वांचें म्हत्वच कळचें ना. गांधीजीचीं तत्वां ऑल्ड फॅशन आनी समाजाक उपकारना तसलीं केन्नाच जावंक शकनात म्हण, आमच्या तरणाट्यांनी जाणां जावपाक जाय. आमचो समाज नीट मार्गान फुडें वतलो, जाल्यार फकत आयजूच न्हय पूण फुडाराक गांधीजीचें तत्वां आमी वेव्हारांत घालचीं पडटलीं.

लिप्यांतर : विशाल सिनाय खांडेपारकार, 8080622370

तोमझीन कार्दोज
9822170102