भांगरभूंय | प्रतिनिधी
म्हापशें, प्रतिनिधी ः बागा दर्यादेगेर हर्ष दिनेश तन्वर (२५, दिल्ली) ह्या पर्यटकाचो खून गांज्या वेल्यान जाल्ल्या वादांतल्यान जालो. गांजो म्हणून तण दिल्ल्याच्या वादांतल्यान दुबावीत टावट्सांनी हर्ष हाचो खून केलो. म्हापशें न्यायालयान दुबावितांक चार दिसांची पुलीस बंदखण आयकयल्या. बागा दर्यादेगेर एक कूड सांपडली. उपरांत हर्ष तन्वर हाचो खून जाल्ल्याचें पोस्टमार्टम रिपोर्टांत स्पश्ट जालें. उपरांत पुलिसांनी हे विशीं खुनाचो गुन्यांव नोंद करून दुबावीत साहील उर्फ विशाल कुमार भटनागर (रा. म्हाड्डावाडो, कळंगुटे आनी मूळ उत्तराखंड), नूर महम्मद खान (रा. काणका-पर्रा) आनी सुनिल निश्वकर्मा (रा. मूळ नेपाळ) ह्या तिगांकूय अटक केल्ली.
ह्या तिगाय दुबावितांक म्हापशें न्यायालयांत मंगळारा हाजीर केले तेन्ना तांकां चार दीस पुलस बंदखणींत दवरपाचो आदेश न्यायालयान दिला.
घडणुके सुवातेर पंचनाम्या वेळार पुलिसांक जोतें सांपडिल्लें. ते प्रमाण पुलिसांनी बागा दर्यागवाठारांतल्या आस्थापनांची सीसीटीव्ही फुटेज तपासली आनी तातूंत तीग जाण शेनवारा सकाळीं वतना दिसले. तांतल्या दोगांच्या पांयांत जोतीं नाशिल्लीं. उपरांत पुलिसांनी चवकशी करून सोमारा तिगाय दुबावितांक अटक केली.
दुबावीत हर्ष हाका गांजो दिवपा खातीर घडणुके सुवातेर गेल्ले. गांज्याच्या जाग्यार तण दिल्ल्याचें हर्ष हाका समजलें. ताची जाप विचारले उपरांत हर्ष आनी त्या तिगांय मदीं वाद जालो. मारपेट जाले उपरांत त्या तिगांय मदल्या दोगांनी हर्षाचेर चाकवान हल्लो केलो. ह्या वेळार हल्लो करतना आपल्या वांगड्यांक आडोवपाचो यत्न करतना एका दुबाविताक वार लागून तो जखमी जालो.
दुबावीत हे ड्रग्स ऍडिक्ट आशिल्ल्यान टावट्सां वरवीं ते ड्रग्स विकपाचो वेव्हार करता हें समजलें. फुडलो तपास कळंगुटे पुलीस करतात.
मजगतीं, ह्या खून प्रकरणा उपरांत कळंगुटे पुलिसांनी आपल्या कार्य क्षेत्रांत दलाली करपी टावट्सांक धरपाक सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
