भांगरभूंय | प्रतिनिधी
भांगरभूंय । प्रतिनिधी
फोंडेंः फाटल्या पांच दिसां सावन गांजे-उसगाव गावांतल्या नळाक उदक येना म्हणून तिडकल्ल्या थळाव्या लोकांनी आयज (बुधवार) ओपा हांगचो उदका प्रकल्प बंद उडोवपाची शिटकावणी दिल्या. फोंडे आनी तिसवाडी तालुक्याक आमच्या गांवांतल्यान उदका पुरवण जाता. मात आमकांच उदका खातीर वणवण करची करून पदरमोड करून उदकाचे टॅन्कर हाडचे पडटात अशें लोकांचें म्हणणे आसा. दोन तालुक्याची तान भागोवपी गांवाक उदक मेळना जाल्यार गांवांत उदका प्रकल्प आसून ताचो आमकां कसलो फायदो असो तांचो प्रश्न आसा.
गांजें हांगा म्हादयचे उदक ओपा उदका प्रकल्पा कडेन घुंवडायतात. ताका लागून फोंडें आनी तिसवाडी तालुक्याक एप्रील आनी मे म्हयन्यांत उदका पुरवण जाता. थळाव्या लोकांक न्हंयेर पंप बसोवन उदक फिल्टर करून ताची पुरवण करतात. फाटल्या चार- पांच दिसां सावन कांय तंत्रीक कारणांक लागून गांवांतलो उदका पुरवण बंद जाल्या. ताका लागूनल लोकांक सुमार देड किलोमीटर अतंरार आशिल्ल्या वझऱ्याचें उदक वाहनांतल्यान हाडचें पडटा. बांदकाम खात्या वतीन एक टॅन्कर धाडला तरी ताचे वरवीं सगल्याक उदका पुरवण करप शक्य नाशिल्ल्यान लोकांक उदकाविणे रावचें पडटा.
मंगळारा कांय स्थानिकांनी सव्ताचे पयशे खर्च करून उदकाचे टॅन्कर गांवांत हाडले. गांजें हांगच्यान ओपा उदका प्रकल्पाक कच्च्या उदकाची पुववण करतात. गांजेचो प्रकल्प लोकांनी बंद केल्यार फोंडें आनी तिसवाडी तालुक्यांतले उदका पुरवणेचेर परिणाम जावपाक शकता. बांदकाम खात्यान उदका पायपलायनीची दुरुस्ती करून लोकांक उदका पुरवण करपाची गरज आसा. पंप सुरू केल्यार लेगीत पायपलायनींतल्यान उदक किद्याक वचना हाचो सोद खात्याचे कर्मचारी घेतात. मंगळारा दनपारां ताकां पायपलायनींत बिघाड जाल्ल्याचें दिसून आयलें. मात ते सुवातेर जायते तरेचे केबल आशिल्ल्यान काम करपाक आडमेळे येतात.
पांच दीस उदक मेळना म्हणून लोक तिडकल्यात. बुधवारा ओपा उदका प्रकल्प बंद करपाचें ताणी थारायलां. ह्या वाठारांतले लोक गांजें हांका रस्त्यार येतले अशी म्हायती गांजें-उगांवचो सरपंच नरेंद्र गांवकार हाणे सांगलें.
गांजें हांका उबारतात तो 25 एमएलडी उदका प्रकल्प सुरू जातगीर गांवांतल्या लोकांक पुराय वेळ उदका पुरवण करपाचें आस्वासन फाटल्या कांय वर्सां सावन राजकी फुडारी लोकांक दित आसात. मात फाटल्या पांच दिसांत नळांक उदक येना म्हणून टॅन्कारान उदक हाडून दितात. मंगळाराक लोकांक पयशे मेजून उदका टॅन्कर हाडचे पडले. ताका लागून आतां आस्वासनां नाकात नियमीत उदका पुरवण करून दाखयात अशें ग्रामस्थांनी सांगलां
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
