भांगरभूंय | प्रतिनिधी
पुराय रस्त्याक बॅरिकेड नाशिल्ल्यान रस्त्याचेर येता माती
भांगरभूंय । प्रतिनिधी
पणजी : गवंडाळी रेल्वे उड्डाण पुलाचो वावर पावसांत लेगीत नेटान चालू आसा. पुराय रस्त्याक बॅरिकेडींग नाशिल्ल्यान उदका सयत माती रस्त्याचेर व्हांवून येता. पावसाचो नेट वाडले उपरांत रेल्वे क्रॉसिंगाचो रस्तो घाताचो जाता, अशी म्हायती दुचाकी चालकांनी दिली. रस्त्या कुशीक पुराय बॅरिकेडींग करपाची मागणी आसा.
गवंडाळी रेल्वे क्रॉसिंगांचेर उड्डाण पूल उबारपाचो वावर चालू आसा. रस्तो सुरू दवरुनूच काम चल्लां. सध्या डोजर तशेंच हेर मशिनरी कामाच्या थळाचेर आसा. माती काडपा सयत खांब्या खातीर बुन्यादीचें काम सुरू आसा. हाका लागून रस्त्या कुशीक माती, तशेंच खडयेच्यो राशी आसात. पावसाचो नेट वाडले उपरांत रस्त्या कुशीक उदक सांचून उरता. ते भायर माती व्हांवून रस्त्याचेर येता. रस्त्या कुशीक कांय भागाचेर बॅरिकेड घातल्या. हाका लागून रातच्या वेळार तशेंच पावसांत चड करून दुचाकी चलोवप घाताचें थारता. रेल्वे वता तेन्ना गाडयांच्यो रांको लागतात. ह्या वेळार रस्तो अशीर थारता. 344 मिटर लांबायेच्या ह्या पुलाक दोनूय वटांनी 1.75 मिटर लांबायेच्यो फुटपाथ आसतल्यो. कुमारजुंवे वटेन 142 मिटर लांबायेचो जोड रस्तो जाल्यार पोरणें गोंय वटेन 165 मिटर लांबायेचो जोड रस्तो आसतलो. पुला खातीर मेसर्स ट्रॅक्स अॅण्ड टॉवर्स प्रायव्हेट लिमिटेड कंपनीक 35.75 कोटींची निविदा जारी जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
